കര്‍ശന പരിശോധന:  റാസല്‍ഖൈമയില്‍ പച്ചക്കറി വില 30 ശതമാനം കുറഞ്ഞതായി സാമ്പത്തിക മന്ത്രാലയം

റാസല്‍ഖൈമ: കര്‍ശന പരിശോധനകളുടെ ഫലമായി റാസല്‍ഖൈമ മാര്‍ക്കറ്റില്‍ പച്ചക്കറിയുടെയും പഴങ്ങളുടെയും വില 30 ശതമാനം വരെ കുറഞ്ഞതായി സാമ്പത്തിക മന്ത്രാലയം അറിയിച്ചു. 
കുറച്ചു ദിവസം മുമ്പ് കിലോഗ്രാമിന് 15 ദിര്‍ഹമായിരുന്ന തക്കാളിവില ചൊവ്വാഴ്ച പത്ത് ദിര്‍ഹമായി കുറഞ്ഞത് സാമ്പത്തിക മന്ത്രാലയത്തിന്‍െറ ഉപഭോക്തൃ സംരക്ഷണ വിഭാഗം ഡയറക്ടര്‍ ഡോ. ഹാഷിം അല്‍ നുഐമി ചൂണ്ടിക്കാട്ടി. നേരത്തെ കിലോഗ്രാമിന് 80 ദിര്‍ഹമായിരുന്ന ചിലയിനം പച്ചക്കറിക്ക് 45 ദിര്‍ഹമായും കുറഞ്ഞു. 
റാസല്‍ഖൈമ മാര്‍ക്കറ്റിലെ കച്ചവടക്കാര്‍ സാമ്പത്തിക മന്ത്രാലയം അംഗീകരിച്ച പുതിയ ലേബല്‍ ഉല്‍പന്നങ്ങളില്‍ പതിക്കുന്നതായും അദ്ദേഹം പറഞ്ഞു. 
ഡോ. ഹാഷിം അല്‍ നുഐമിയുടെ നേതൃത്വത്തില്‍ റാസല്‍ഖൈമ മാര്‍ക്കറ്റില്‍ ചൊവ്വാഴ്ച നടത്തിയ പരിശോധനയില്‍ സാമ്പത്തിക മന്ത്രാലയം റാസല്‍ഖൈമ ഓഫിസ് ഡയറക്ടര്‍ റാഷിദ് അല്‍ ഹബ്സിയും പങ്കെടുത്തു. 
അതേസമയം ഫുജൈറയിലെ പച്ചക്കറി, പഴ, മാംസ മാര്‍ക്കറ്റുകളില്‍ തിങ്കളാഴ്ച നുഐമിയുടെ നേതൃത്വത്തില്‍ പരിശോധന നടത്തിയിരുന്നു.