ദേശീയഗാനത്തെ അവഹേളിച്ചുവെന്ന്  പരാതി: ബി.എം.ഡബ്ള്യു പരസ്യം പിന്‍വലിച്ചു

ദുബൈ: യു.എ.ഇ ദേശീയഗാനത്തെ അവഹേളിച്ചുവെന്ന് പരാതി ലഭിച്ചതിനെ തുടര്‍ന്ന് പ്രമുഖ കാര്‍ നിര്‍മാതാക്കളായ ബി.എം.ഡബ്ള്യു ടെലിവിഷന്‍ പരസ്യം പിന്‍വലിച്ചു. സാമൂഹിക മാധ്യമങ്ങളില്‍ രൂക്ഷമായ എതിര്‍പ്പാണ് 30 സെക്കന്‍ഡ് പരസ്യത്തിനുണ്ടായത്.  അല്‍ഐന്‍ ഫുട്ബാള്‍ ടീം മത്സരത്തിന് മുമ്പായി ദേശീയഗാനം ആലപിക്കുന്നതിനിടെ പകുതിവെച്ച് നിര്‍ത്തി ഗ്രൗണ്ടിന് പുറത്ത് പാര്‍ക്ക് ചെയ്ത ഏറ്റവും പുതിയ മോഡല്‍ ബി.എം.ഡബ്ള്യു കാറില്‍ കയറിപ്പോകുന്നതാണ് പരസ്യത്തില്‍ ചിത്രീകരിച്ചത്. രാജ്യസ്നേഹത്തേക്കാള്‍ വലുതാണ് കാറെന്ന സന്ദേശമാണ് പരസ്യം നല്‍കുന്നതെന്ന വിമര്‍ശമാണ് ആളുകള്‍ ഉയര്‍ത്തിയത്. പരസ്യം നിരോധിക്കണമെന്നാവശ്യപ്പെട്ട് സാമൂഹിക മാധ്യമങ്ങളില്‍ കാമ്പയിന്‍ നടന്നു. തുടര്‍ന്നാണ് പരസ്യം പിന്‍വലിക്കാന്‍ കമ്പനി തീരുമാനിച്ചിരിക്കുന്നത്.