കമ്പനിയുടെ  ഫേസ്ബുക് പാസ്വേഡ്  മാറ്റിയ തൊഴിലാളിക്ക് തടവുശിക്ഷ

അബൂദബി: തൊഴില്‍ സ്ഥാപനത്തിന്‍െറ ഫേസ്ബുക് പേജിന്‍െറ പാസ്വേഡ് മാറ്റിയ തൊഴിലാളിക്ക് തടവുശിക്ഷ നല്‍കിയ അപ്പീല്‍ കോടതിയുടെ വിധി പരമോന്നത കോടതി ശരിവെച്ചു. ഏഷ്യന്‍ വംശജനായ ഇയാള്‍ ജോലിചെയ്യുന്ന സ്ഥാപനത്തിന്‍െറ അക്കൗണ്ട് പാസ്വേഡ് അനുമതിയില്ലാതെ മാറ്റിയെന്നാണ് പ്രോസിക്യൂഷന്‍ ചുമത്തിയ കുറ്റം.  
തങ്ങളുടെ ഫേസ്ബുക് അക്കൗണ്ട് ഹാക്ക് ചെയ്തുവെന്ന കമ്പനിയുടെ പരാതിയെ തുടര്‍ന്ന് നടത്തിയ അന്വേഷണത്തിലാണ് കുറ്റക്കാരന്‍ തൊഴിലാളിയാണെന്ന് കണ്ടത്തെിയത്. കമ്പനിക്ക് ഫേസ്ബുക് അക്കൗണ്ട് ഉപയോഗിക്കാന്‍ കഴിയാതെയായിരുന്നു. കീഴ്കോടതി ഇയാള്‍ക്ക് ഒരു മാസം തടവും തുടര്‍ന്ന് നാടുകടത്താനും വിധിച്ചു. നഷ്ടപരിഹാരമായി കമ്പനിക്ക് 5000 ദിര്‍ഹം നല്‍കാനും ഉത്തരവിട്ടു.
വിധിക്കെതിരെ തൊഴിലാളിയും പ്രോസിക്യൂഷനും അപ്പീല്‍ കോടതിയെ സമീപിച്ചു. അപ്പീല്‍ കോടതി നാടുകടത്താനുള്ള ഉത്തരവ് ഒഴിവാക്കുകയും ബാക്കിയുള്ളവ നിലനിര്‍ത്തുകയും ചെയ്തു. ഇതിനെതിരെ ഇരുകക്ഷികളും പരമോന്നത കോടതിയെ സമീപിക്കുകയായിരുന്നു. പരമോന്നത കോടതി വിധി ദുര്‍ബലപ്പെടുത്തുകയും അപ്പീല്‍ കോടതിയിലെ മറ്റൊരു ബെഞ്ചിന്‍െറ പരിഗണനക്ക് വിടുകയും ചെയ്തു. പുതിയ ബെഞ്ച് അപ്പീല്‍ കോടതിയുടെ വിധി ശരിവെക്കുകയായിരുന്നു.