ദുബൈയില്‍ വാഹനാപകടം; ഈരാറ്റുപേട്ട സ്വദേശി മരിച്ചു

ദുബൈ: അല്‍ഐന്‍- ദുബൈ റോഡില്‍ ലിസൈലിയിലുണ്ടായ വാഹനാപകടത്തില്‍ കോട്ടയം ഈരാറ്റുപേട്ട സ്വദേശി മരിച്ചു. പുത്തന്‍പീടികയില്‍ അബ്ദുല്‍സലാമിന്‍െറ മകന്‍ റൂബിഷ് (23) ആണ് മരിച്ചത്. 
ദുബൈയിലെ മരുഭൂ പ്രദേശമായ അല്‍ ലബീബ് പൊലീസ് സ്റ്റേഷന്‍ പരിധിയിലെ ലിസൈലിയില്‍ വ്യാഴാഴ്ച രാത്രിയായിരുന്നു അപകടം. പട്ടാമ്പി സ്വദേശി ബഷീര്‍ ഓടിച്ചിരുന്ന ഡബിള്‍ കാബിന്‍ പിക്കപ് വാഹനം മറിയുകയായിരുന്നു. 
മൂന്നുമാസമായി ലിസൈലിയിലെ ഫാര്‍മസിയില്‍ ജോലി ചെയ്യുകയാണ് റൂബിഷ്. കമ്പനിയുടമയുടെ തോട്ടത്തില്‍ സുഹൃത്തുക്കള്‍ക്കൊപ്പം പോയി മടങ്ങുമ്പോഴായിരുന്നു അപകടം.
വാഹനത്തില്‍ കൂടെയുണ്ടായിരുന്ന നിലമ്പൂര്‍ സ്വദേശി നൗഫല്‍, ഈരാറ്റുപേട്ടക്കാരായ മാഹിന്‍, സല്‍മാന്‍ എന്നിവര്‍ പരിക്കുകളോടെ ദുബൈ റാശിദ് ഹോസ്പിറ്റലില്‍ ചികിത്സയിലാണ്. റൂബിഷിന്‍െറ മൃതദേഹം നടപടിക്രമങ്ങള്‍ക്ക് ശേഷം നാട്ടിലത്തെിക്കാന്‍ ശ്രമം നടക്കുന്നു. മാതാവ്: ലൈല. സഹോദരന്‍: ഷിബിന്‍.