ഐ.എസ്. ബന്ധവും അനുഭാവവും: യു.എ.ഇ നാടുകടത്തിയത് ഡസനോളം ഇന്ത്യക്കാരെ

അബൂദബി: തീവ്രവാദ സംഘടനയായ ഐ.എസിനോട് ബന്ധവും അനുഭാവവും പുലര്‍ത്തിയെന്ന് വ്യക്തമായതിന്‍െറ അടിസ്ഥാനത്തില്‍ യു.എ.ഇ ഡസനോളം ഇന്ത്യക്കാരെ നാടുകടത്തിയതായി ഇന്ത്യന്‍ ഇംഗ്ളീഷ് പത്രം റിപ്പോര്‍ട്ട് ചെയ്തു. കഴിഞ്ഞവര്‍ഷം മുതല്‍ ഇതുവരെയാണ് വിവിധ സംസ്ഥാനങ്ങളില്‍ നിന്നുള്ള ഇന്ത്യക്കാരെ യു.എ.ഇ നാടുകടത്തിയത്. കഴിഞ്ഞയാഴ്ച മൂന്ന് ഇന്ത്യക്കാരെ ഡല്‍ഹിയിലേക്ക് കയറ്റി അയക്കുകയും ചെയ്തിരുന്നു. 
ഐ.എസിനോട് അനുഭാവം കാട്ടിയ മൂന്ന് പേരെയാണ് നാടുകടത്തിയത്. കഴിഞ്ഞ സെപ്റ്റംബറില്‍ നാല് ഇന്ത്യക്കാരെ ഐ.എസ് ബന്ധത്തിന്‍െറ പേരില്‍ നാടുകടത്തിയിരുന്നു. ഇതോടൊപ്പം ഇസ്ലാമിക് സ്റ്റേറ്റിലേക്ക് റിക്രൂട്ട്മെന്‍റ് നടത്താന്‍ ശ്രമിച്ചതിന് 37കാരിയായ അഫ്ഷാ ജബീനിനെയും നാടുകടത്തിയിരുന്നു. കഴിഞ്ഞ വര്‍ഷം ജനുവരിയില്‍ ഹൈദരാബാദില്‍ നിന്ന് ദുബൈ വഴി തുര്‍ക്കിയിലൂടെ സിറിയയിലേക്ക് യാത്ര ചെയ്ത് ഐ.എസില്‍ ചേരാന്‍ ശ്രമിച്ചയാളെ ഇന്ത്യന്‍ അധികൃതരും അറസ്റ്റ് ചെയ്തിരുന്നു.