അല്‍ ദഫ്റ ഉത്സവം: ശൈഖ് സുല്‍ത്താന്‍െറ ഒട്ടകത്തിന് സൗന്ദര്യ കിരീടം

അബൂദബി: പത്താമത് അല്‍ ദഫ്റ ഉത്സവത്തിന്‍െറ ഭാഗമായി സംഘടിപ്പിച്ച സൗന്ദര്യ മത്സരത്തില്‍ യു.എ.ഇ പ്രസിഡന്‍റിന്‍െറ പ്രതിനിധി ശൈഖ് സുല്‍ത്താന്‍ ബിന്‍ സായിദ് ആല്‍ നഹ്യാന്‍െറ ഉടമസ്ഥതയിലുള്ള ഒട്ടകം വിജയിയായി. ഒമാന്‍ വംശത്തില്‍ പെട്ട സുവര്‍ണ-ചുവപ്പ് ഒട്ടകങ്ങള്‍ക്കുള്ള ‘ആയേല്‍’ വിഭാഗത്തിലാണ് ശൈഖ് സുല്‍ത്താന്‍െറ ഒട്ടകം വിജയം നേടിയത്. സൗദി അറേബ്യന്‍ വംശത്തിലെ കറുത്ത കുതിരകള്‍ക്കുള്ള വിഭാഗമായ ‘മജാഹിമി’ല്‍ ഖമീസ് ആല്‍ മസൂറിയുടെ ഒട്ടകങ്ങളാണ് വിജയം നേടിയത്. 
പടിഞ്ഞാറന്‍ മേഖലയിലെ മദീന സായിദില്‍ ഡിസംബര്‍ 13ന് ആരംഭിച്ച അല്‍ ദഫ്റ ഉത്സവം 29ന് സമാപിച്ചു. അബൂദബി സാംസ്കാരിക പരിപാടി-പൈതൃകോത്സവ കമ്മിറ്റിയാണ് ഉത്സവം സംഘടിപ്പിച്ചത്. വിജയികള്‍ക്ക് ശൈഖ് സായിദ് ബിന്‍ ഹംദാന്‍ ബിന്‍ സായിദ് ആല്‍ നഹ്യാന്‍ ട്രോഫി സമ്മാനിച്ചു.