ദുബൈ ഓപറ ഹൗസ് അണിഞ്ഞൊരുങ്ങുന്നു

ദുബൈ: ബുര്‍ജ് ഖലീഫക്ക് സമീപത്തെ ദുബൈ ഡൗണ്‍ടൗണ്‍ ഇനി ലോകോത്തര കലാപ്രകടനങ്ങള്‍ക്ക് വേദിയാകും. ഡൗണ്‍ടൗണില്‍ നിര്‍മിക്കുന്ന ദുബൈ ഓപറ ഹൗസിന്‍െറ അവസാനവട്ട മിനുക്കുപണികള്‍ പുരോഗമിക്കുകയാണ്. ഈ മാസം 31ന് ഓപറ ഹൗസ് തുറന്നുകൊടുക്കും. ഉദ്ഘാടനത്തിന്‍െറ ഭാഗമായി ലോകപ്രശസ്ത സ്പാനിഷ് കലാകാരന്‍ പ്ളാസിഡോ ഡോമിങ്ങോയുടെ നേതൃത്വത്തില്‍ സംഗീത പരിപാടി നടക്കും. തുടര്‍ന്നുള്ള നാല് മാസങ്ങളില്‍ 50ഓളം സംഗീത പരിപാടികള്‍ ഓപറ ഹൗസില്‍ നടത്താന്‍ നിശ്ചയിച്ചിട്ടുണ്ട്.
2000 പേര്‍ക്ക് കലാ പ്രകടനങ്ങള്‍ ആസ്വദിക്കാനാവുന്ന ഓപറ ഹൗസ് അറേബ്യന്‍ വാസ്തുശില്‍പ മാതൃകയിലാണ് നിര്‍മിച്ചിരിക്കുന്നത്.  ദുബൈ ക്രീക്കിലൂടെ സഞ്ചരിക്കുന്ന പരമ്പരാഗത അറേബ്യന്‍ ഉരുവിന്‍െറ രൂപത്തിലാണ് ഓപറ ഹൗസ് രൂപകല്‍പന ചെയ്തിരിക്കുന്നത്.

ദുബൈ ഡൗണ്‍ടൗണില്‍ ഉദ്ഘാടനത്തിനൊരുങ്ങുന്ന ഓപറ ഹൗസ്

 

ഇമാര്‍ പ്രോപ്പര്‍ട്ടീസാണ് നിര്‍മാതാക്കള്‍. പ്രധാന സ്റ്റേജിന് പുറമെ ഓര്‍ക്കസ്ട്രക്ക് പ്രത്യേക സംവിധാനം ഓപറ ഹൗസിലുണ്ട്. സ്കൈ ഗാര്‍ഡനും റസ്റ്റോറന്‍റുകളും പുതുമയാകും. കാണികള്‍ക്ക് കാത്തിരിപ്പിനുള്ള സ്ഥലം, ടാക്സി നിര്‍ത്താനുള്ള സ്ഥലം, പാര്‍ക്കിങ് സ്ഥലം തുടങ്ങിയ പ്രത്യേകം ഒരുക്കുന്നുണ്ട്.
മൂന്നുതരത്തില്‍ സജ്ജീകരിക്കാവുന്ന വിധത്തിലാണ് ഓപറ ഹൗസിന്‍െറ ഡിസൈന്‍. സംഗീത പരിപാടികള്‍ക്ക് പുറമെ പ്രദര്‍ശനങ്ങള്‍, കുട്ടികളുടെ പരിപാടികള്‍, തമാശ പരിപാടികള്‍ തുടങ്ങിയവയും ഇവിടെ നടക്കും. ആഡംബര ഹോട്ടലുകള്‍, താമസ കേന്ദ്രങ്ങള്‍, പാര്‍ക്കുകള്‍ എന്നിവയും ഓപറ ഹൗസിനൊപ്പം നിര്‍മിക്കുന്നുണ്ട്. ലണ്ടനിലെ റോയല്‍ ആല്‍ബര്‍ട്ട് ഹാളിന്‍െറ ചീഫ് ഓപറേറ്റിങ് ഓഫിസറായിരുന്ന ജാസ്പര്‍ ഹോപാണ് ദുബൈ ഓപറയുടെ ചീഫ് എക്സിക്യൂട്ടിവ് ഓഫിസര്‍. ഓപറ ഹൗസിന്‍െ നിര്‍മാണ ചെലവ് ഇമാര്‍ വെളിപ്പെടുത്തിയിട്ടില്ല.