വിദേശത്ത് അപകടകരമായ രീതിയില്‍ വാഹനമോടിച്ച യു.എ.ഇ സ്വദേശിക്കെതിരെ അറസ്റ്റ് വാറന്‍റ്

അബൂദബി: യൂറോപ്യന്‍ രാജ്യത്ത് അപകടകരമായ രീതിയില്‍ വാഹനമോടിച്ചതിന് സ്വദേശിക്കെതിരെ അബൂദബി പബ്ളിക് പ്രോസിക്യൂഷന്‍ അറസ്റ്റ് വാറന്‍റ് പുറപ്പെടുവിച്ചു. റോഡില്‍ അഭ്യാസപ്രകടനം നടത്തുന്നത് വിഡിയോയില്‍ പകര്‍ത്തി ഇയാള്‍ സാമൂഹിക മാധ്യമങ്ങള്‍ വഴി പ്രചരിപ്പിച്ചിരുന്നു.
ആളുകളുടെ ശ്രദ്ധ ക്ഷണിക്കാനാണ് ഉയര്‍ന്ന ശബ്ദത്തില്‍ വാഹനമോടിച്ച് അഭ്യാസ പ്രകടനം നടത്തുന്നതെന്ന് വിഡിയോയില്‍ വ്യക്തമാണ്. യു.എ.ഇ നമ്പര്‍ പ്ളേറ്റുള്ള വാഹനമാണ് ഇയാള്‍ ഓടിച്ചിരുന്നത്. വിദേശരാജ്യത്തായാലും ഇത്തരം നിയമലംഘനങ്ങള്‍ അംഗീകരിക്കാന്‍ കഴിയില്ളെന്ന് അബൂദബി അറ്റോണി ജനറല്‍ കൗണ്‍സലര്‍ അലി മുഹമ്മദ് അല്‍ ബലൂഷി പറഞ്ഞു. വിദേശരാജ്യത്ത് പോകുമ്പോള്‍ അവിടുത്തെ നിയമങ്ങള്‍ അംഗീകരിക്കാന്‍ ബാധ്യസ്ഥരാണെന്ന് അദ്ദേഹം കൂട്ടിച്ചേര്‍ത്തു.