വെള്ളിയാഴ്ച വരെ അസ്ഥിര കാലാവസ്ഥ;  കാറ്റിനും മഴക്കും സാധ്യത

അബൂദബി: രാജ്യത്തിന്‍െറ വിവിധ ഭാഗങ്ങളില്‍ വെള്ളിയാഴ്ച വരെ അസ്ഥിര കാലാവസ്ഥ തുടരുമെന്ന് കാലാവസ്ഥാ നിരീക്ഷണ വിദഗ്ധര്‍. ശക്തമായ കാറ്റിനും ചില ഭാഗങ്ങളില്‍ മഴക്കും സാധ്യതയുണ്ടെന്ന് നാഷനല്‍ സെന്‍റര്‍ ഫോര്‍ മീറ്ററോളജി ആന്‍റ് സീസ്മോളജി അധികൃതര്‍ അറിയിച്ചു. ബുധനാഴ്ച തീരപ്രദേശങ്ങളില്‍ 55 കിലോമീറ്റര്‍ വരെ വേഗതയില്‍ കാറ്റുണ്ടായിരുന്നു. വ്യാഴാഴ്ചയും ശക്തമായ കാറ്റിന് സാധ്യതയുണ്ട്. രാജ്യം മുഴുവന്‍ മേഘാവൃതമായി തുടരും. തീര പ്രദേശങ്ങളില്‍ മഴക്കും സാധ്യതയുണ്ട്. വടക്കന്‍, പടിഞ്ഞാറന്‍ ഭാഗങ്ങളിലും ദ്വീപുകളിലും ചെറുതായി മഴ പെയ്തേക്കും. ശക്തമായ കാറ്റ് മൂലം അന്തരീക്ഷത്തില്‍ പൊടി നിറഞ്ഞ് ദൂരക്കാഴ്ച കുറയാന്‍ സാധ്യതയുണ്ട്. വാഹനങ്ങള്‍ ഓടിക്കുന്നവര്‍ ജാഗ്രത പുലര്‍ത്തണമെന്നും നിര്‍ദേശിച്ചിട്ടുണ്ട്. അറബിക്കടലും ഒമാന്‍ ഉള്‍ക്കടലും പ്രക്ഷുബ്ധമായിരിക്കും. അതേസമയം, കാറ്റും മേഘാവൃതമായ അന്തരീക്ഷവും മൂലം ചൂടില്‍ ഗണ്യമായ കുറവുണ്ടായിട്ടുണ്ട്. രാജ്യത്തിന്‍െറ വിവിധ ഭാഗങ്ങളില്‍ ബുധനാഴ്ച കുറഞ്ഞ താപനില 22 ഡിഗ്രിയും കൂടിയത് 37 ഡിഗ്രിയുമാണ് അനുഭവപ്പെട്ടത്.