യു.എ.ഇയിൽ 15 മിസൈലുകളും 119 ഡ്രോണുകളും തടഞ്ഞു

ദുബൈ: ശനിയാഴ്ച യു.എ.ഇയെ ലക്ഷ്യമാക്കി എത്തിയ 15 മിസൈലുകളും 119 ഡ്രോണുകളും തടഞ്ഞതായി പ്രതിരോധ മന്ത്രാലയം സ്ഥിരീകരിച്ചു. 16 ബാലിസ്റ്റിക് മിസൈലുകളാണ്​ രാജ്യത്തിന്​ നേരെ സംഘർഷത്തിന്‍റെ എട്ടാം ദിവസമെത്തിയത്​. ഇവയിൽ 15 എണ്ണം വിജയകരമായി തടഞ്ഞപ്പോൾ ഒരു ബാലിസ്റ്റിക് മിസൈൽ കടലിൽ വീഴുകയാണുണ്ടായത്​. ആകെ 121 ഡ്രോണുകളാണ്​ കഴിഞ്ഞദിവസം രാജ്യത്തെ ലക്ഷ്യമാക്കി​ വന്നത്​. ഇതിൽ 119 എണ്ണം തടഞ്ഞ​പ്പോൾ രണ്ടെണ്ണം യു.എ.ഇയുടെ ഭൂപ്രദേശത്തിനുള്ളിൽ വീണതായും ​മന്ത്രാലയം വ്യക്തമാക്കി.

വ്യോമ പ്രതിരോധത്തിനിടെ ദുബൈ വിമാനത്താവളത്തിൽ അവശിഷ്ടങ്ങൾ വീണ്​ ചെറിയ അപകടമുണ്ടായതായി അധികൃതർ സ്ഥിരീകരിച്ചു. സംഭവത്തിൽ ആർക്കും പരിക്കേറ്റിട്ടില്ല.

അതേസമയം, സമൂഹ മാധ്യമങ്ങളിൽ പ്രചരിക്കുന്ന രീതിയിൽ സംഭവങ്ങളില്ലെന്ന്​ അധികൃതർ പ്രസ്താവനയിൽ വ്യക്​തമാക്കി. സംഭവത്തെ തുടർന്ന്​ അൽപ സമയം സുരക്ഷ പരിഗണിച്ച്​ വിമാനത്താവളത്തിന്‍റെ പ്രവർത്തനം താൽകാലികമായി നിർത്തിവെച്ചിരുന്നു. എന്നാൽ വൈകാതെ സുരക്ഷ ഉറപ്പാക്കി പ്രവർത്തനം പുനരാരംഭിക്കുകയും ചെയ്തു.

ഇറാന്റെ ആക്രമണങ്ങൾ ആരംഭിച്ചതിനുശേഷം ഇതുവരെ ആകെ 221 ബാലിസ്റ്റിക് മിസൈലുകൾ രാജ്യത്തിനു​ നേരെ വന്നിട്ടുണ്ട്​. ഇതിൽ 205 എണ്ണം നശിപ്പിക്കുകയും 14 എണ്ണം കടലിൽ വീഴുകയും രണ്ട് മിസൈലുകൾ യു.എ.ഇയുടെ ഭൂപ്രദേശത്ത് പതിക്കുകയും ചെയ്തു. ആകെ 1,305 ഇറാനിയൻ ഡ്രോണുകളാണ്​ ഈ ദിവസങ്ങളിൽ കണ്ടെത്തിയിട്ടുള്ളത്​. അവയിൽ 1,229 എണ്ണം എയർ ഡിഫൻസ് സംവിധാനങ്ങൾ തടഞ്ഞു. 76 ഡ്രോണുകൾ രാജ്യത്തിന്‍റെ വിവിധ ഭാഗങ്ങളിൽ വീഴുകയും ചെയ്തു. കൂടാതെ, എട്ട് ക്രൂസ് മിസൈലുകളും വിജയകരമായി നശിപ്പിക്കാൻ വ്യോമ പ്രതിരോധ സംവിധാനത്തിന്​ സാധിച്ചു.

ആകെ മൂന്ന്​ മരണങ്ങളും 112 പരിക്കുകളുമാണ്​ സംഭവങ്ങളിൽ റിപ്പോർട്ട്​ ചെയ്യപ്പെട്ടത്​. രാജ്യത്തിന്റെ സുരക്ഷയും സ്ഥിരതയും ഉറപ്പാക്കുന്നതിനും ഭീഷണികളെ ശക്തമായി നേരിടുന്നതിനും യു.എ.ഇ സായുധ സേന പൂർണമായി തയ്യാറാണെന്ന് പ്രതിരോധ മന്ത്രാലയം വ്യക്തമാക്കി.