എക്​സ്പോ​ മിഴിതുറക്കാൻ 100 ദിനങ്ങൾ

ദുബൈ: അറബ്​ ലോകത്തെ ഏറ്റവും വലിയ മേളയുടെ വാതിൽ തുറക്കാൻ ഇനി 100 ദിവസം കൂടി. യു.എ.ഇയുടെ സാമ്പത്തിക, വാണിജ്യ, സാംസ്​കാരിക, സാ​ങ്കേതിക മേഖലകളെ ഉടച്ചുവാർക്കാനൊരുങ്ങുന്ന എക്​സ്​പോ 2020യിലേക്ക്​ കണ്ണും കാതും കൂർപ്പിച്ച്​ ​കാത്തിരിക്കയാണ്​ അറബ്​ ലോകം. അഞ്ചു​ വർഷം മുമ്പ്​​ തുടങ്ങിയ ഒരുക്കങ്ങൾ അവസാനഘട്ടത്തിലാണ്​. എല്ലാ രാജ്യങ്ങളുടെയും പവിലിയനുകൾ പൂർത്തിയായി. 1083 ഏക്കറിൽ വ്യാപിച്ച നഗരിയിൽ ശതകോടികളുടെ ആഘോഷങ്ങളാണ്​ ഒരുങ്ങുന്നത്​.

ഒക്​ടോബർ ഒന്നു​ മുതൽ 2022 മാർച്ച്​ 31​വരെയാണ്​ ലോകത്തെ വിസ്​മയിപ്പിക്കാൻ എക്​സ്​പോ എത്തുന്നത്​.കഴിഞ്ഞ വർഷം ഒക​്​ടോബർ 20ന്​ തുടങ്ങേണ്ടതാണ്​. എന്നാൽ, അപ്രതീക്ഷിത മഹാമാരി എക്​സ്​പോയുടെയും കലണ്ടർ തെറ്റിച്ചു. ദിവസങ്ങൾ നീണ്ട ചർച്ചകൾക്കു​ശേഷം ഒരുവർഷത്തേക്ക്​ മാറ്റിവെക്കാൻ തീരുമാനിക്കുകയായിരുന്നു. എങ്കിലും, എക്​സ്​പോ 2020 എന്നപേര്​ നിലനിർത്താനും തീരുമാനിച്ചു.

190 രാജ്യങ്ങളുടെ പവിലിയനാണ്​ എക്​സ്​പോ നഗരിയിൽ ഒരുങ്ങുന്നത്​. ഇന്ത്യയുടേതടക്കം പവിലിയനുകൾ അവസാന ഘട്ടത്തിലാണ്​. ലോകം കണ്ടിട്ടില്ലാത്ത കാഴ്ചകളും അനുഭൂതികളും പ്രേക്ഷകർക്ക് സമ്മാനിക്കാൻ പറഞ്ഞറിയിക്കാനാവാത്ത വൈവിധ്യങ്ങളാണ് ഒരുക്കിയിരിക്കുന്നത്. ഖത്തർ ലോകകപ്പും ദുബൈ എക്​സ്​പോയുമാണ്​ അടുത്ത രണ്ട്​ വർഷം ​ഗൾഫ്​ രാജ്യങ്ങളുടെ ഏറ്റവും വലിയ പ്രതീക്ഷകൾ. വാക്​സിനേഷൻ പരമാവധി ജനങ്ങളിലേക്കെത്തിച്ച്​ കോവിഡ്​ ബാധിതരുടെ എണ്ണം കുറക്കാനും സുരക്ഷിത എക്​സ്​പോ നടത്താനുമാണ്​ പദ്ധതി.

അൽപം ചരിത്രം

170 വർഷത്തെ ചരിത്രം പറയാനുണ്ട്​ എക്​സ്​പോക്ക്​. 1851ൽ ലണ്ടനിലാണ്​ ആദ്യ എക്​സ്​പോ നടക്കുന്നത്​. ഓരോ അഞ്ചു​ വർഷം കൂടു​േമ്പാഴും ബ്യൂറോ ഓഫ്​ ഇൻറർനാഷനൽ എക്​സ്​പോസിഷ​െൻറ മേൽനോട്ടത്തിലാണ്​ എക്​സ്​പോ അരങ്ങേറുന്നത്​.

വിവിധ കാരണങ്ങളാൽ പല വർഷങ്ങളിലും കാലംതെറ്റിയാണ്​ എക്​സ്​പോ നടന്നത്​. ആറു​ മാസമാണ്​ മേള. 1962ലെ ലണ്ടൻ എക്​സ്​പോയിലാണ്​ ചാൾ​സ്​ ബാബേജ്​ ആദ്യമായി കമ്പ്യൂട്ടർ അവതരിപ്പിക്കുന്നത്​. 1876ൽ അലക്​സാണ്ടർ ഗ്രഹാംബെൽ ടെലിഫോൺ ലോകത്തിന്​ സമർപ്പിച്ചതും മറ്റൊരു എക്​സ്​പോയിലൂടെയാണ്​. ടെലിവിഷനും ​മൊബൈൽ ഫോൺ സാ​ങ്കേതിക വിദ്യകളുമെല്ലാം ലോകത്തിന്​ പരിചയപ്പെടുത്തിയത്​ 20ാം നൂറ്റാണ്ടിലെ എക്​സ്​പോ വേദികളാണ്​.

കഴിഞ്ഞ എക്​സ്​പോ 2015ൽ ഇറ്റലിയിലെ മിലാനിലായിരുന്നു. ഇതിനും രണ്ട്​ വർഷം മുൻപാണ്​ ദുബൈ എക്​സ്​പോ പ്രഖ്യാപിക്കപ്പെട്ടത്​. തുർക്കിയിലെ ഇസ്​മിർ, റഷ്യയിലെ യെക്കാറ്റരിൻബർഗ്​, ബ്രസീലിലെ സാവോ പോളോ എന്നീ നഗരങ്ങളുടെ അവകാശവാദങ്ങളെ മറികടന്നാണ്​ ദുബൈ 2020ൽ എക്​സ്​പോ നടത്താനുള്ള അവകാശം സ്വന്തമാക്കിയത്​. ഇതിലേക്കുള്ള തന്ത്രങ്ങൾ മെനയുന്നതിന്​ 2010ൽ ചൈനയിൽ നടന്ന ഷാങ്​ഹായ്​ എക്​സ്​പോയിൽ യു.എ.ഇയുടെ നിരീക്ഷണമുണ്ടായിരുന്നു. ചൈനയുടെ സാമ്പത്തികരംഗത്തെ മാറ്റിമറിച്ച മേളയായിരുന്നു ഇത്​.

2020ലെ നടത്തിപ്പ്​ അവകാശം കിട്ടിയതോടെ 2015ലെ മിലാൻ എക്​സ്​പോയിലെ സജീവ സാന്നിധ്യമായി യു.എ.ഇ. അന്നു മുതൽ തുടങ്ങിയ പഠനങ്ങളും നിരീക്ഷണങ്ങളുമാണ്​ ഇപ്പോൾ യാഥാർഥ്യമാകാൻ പോകുന്നത്​. അറബ്​ ലോകത്തേക്ക്​ ആദ്യമായാണ്​ എക്സ്​പോ വിരുന്നെത്തുന്നത്​.

യാത്രസൗകര്യം തയാർ

ആറു​ മാസത്തിനിടെ രണ്ടു കോടിയിലേറെ സന്ദർശകരെയാണ്​ ദുബൈ പ്രതീക്ഷിക്കുന്നത്​. അതിനാൽതന്നെ, വമ്പൻ ഗതാഗത സൗകര്യങ്ങളാണ്​ ഒരുങ്ങുന്നത്​. ദുബൈ അൽ മക്​തൂം വിമാനത്താവളമായിരിക്കും എക്​സ്​പോ നഗരിയോട്​ ഏറ്റവും അടുത്ത എയർപോർട്ട്​. ഒരേ സമയം ആയിരക്കണക്കിന്​ വാഹനങ്ങൾ പാർക്ക്​ ചെയ്യാൻ സൗകര്യമൊരുക്കിയിട്ടുണ്ട്​.

എക്​സ്​പോയിലേക്ക്​ ​പ്രത്യേക റോഡുതന്നെ ഒരുക്കിയിരിക്കുന്നു. നഗരിയിലേക്കുള്ള മെട്രോ ലൈനും എക്​സ്​പോ സ്​റ്റേഷനും അടുത്തിടെ തുറന്നിരുന്നു. ഇവിടേക്കുള്ള ആറ്​ സ്​റ്റേഷനുകളിൽ അഞ്ചും തുറന്നു. ഇവിടേക്ക്​ മെട്രോ സർവിസ്​ ആരംഭിച്ചിട്ടു​െണ്ടങ്കിലും പൊതുജനങ്ങൾക്ക്​ ​പ്രവേശനം നൽകുന്നില്ല. എക്​സ്​പോയുമായി ബന്ധപ്പെട്ട്​ പ്രവർത്തിക്കുന്നവർക്ക്​ മാത്രമാണ്​ ഇപ്പോൾ ​പ്രവേശനം. ജുമൈറ ഗോൾഫ്​ എസ്​റ്റേറ്റ്​ സ്​റ്റേഷൻ മാത്രമാണ്​ ഇനി തുറക്കാനുള്ളത്​.

ഏറ്റവും കൂടുതൽ യാത്രക്കാർ എത്തുമെന്ന്​ കരുതുന്ന എക്​സ്​പോ സ്​​റ്റേഷന്​ 18,800 ചതുരശ്ര മീറ്റർ വലിപ്പമുണ്ട്​. ദിവസവും 5.22 ലക്ഷം പേർക്ക്​ യാത്ര ചെയ്യാം. മണിക്കൂറിൽ 27,000 യാത്രക്കാരെ വഹിക്കാനുള്ള ശേഷി ഈ സ്​റ്റേഷനുണ്ട്​. തിരക്കേറിയ സമയങ്ങളിൽ രണ്ടര മിനിറ്റി​െൻറ ഇടവേളകളിൽ ട്രെയിനുകളെത്തും. എക്​സ്​പോ സന്ദർശകർക്ക്​ മാത്രമല്ല, ഈ മേഖലയി​ലെ താമസക്കാർക്കും മറ്റ്​ സ്​ഥാപനങ്ങളിലെ ജീവനക്കാർക്കും തൊഴിലാളികൾക്കും ഏറെ ഉപകാരപ്പെടുന്ന പാതയാണിത്​.

സൈക്കിളിലെത്തുന്നവർക്കായി പ്രത്യേക പാതയും നിർമിക്കുന്നുണ്ട്​. സൈക്കിളിനെയും ബസ്​ സർവിസിനെയും ഇ- സ്​കൂട്ടറുകളെയും കോർത്തിണക്കിയാണ്​ ഈ റൂട്ട്​ സജ്ജമാകുന്നത്​.

എക്​സ്​പോക്ക്​ ശേഷം എന്ത്​?

സംശയിക്കേണ്ട, അവിടെയൊരു പുതിയ നഗരം തന്നെ കെട്ടി​പ്പടുക്കാനാണ്​ ദുബൈയുടെ തീരുമാനം. ഡിസ്​ട്രിക്​ട്​ 2020 എന്ന പേരിലായിരിക്കും സ്​മാർട്ട്​​ സിറ്റി രൂപപ്പെടുക.

എക്​സ്​പോ അവസാനിച്ച്​ ആറു​ മാസത്തിനും ഒരുവർഷത്തിനുള്ളിൽ പുതുനഗരം യാഥാർഥ്യമാകും. നിലവിൽ സർക്കാർ ഉടമസ്​ഥതയിലുള്ള കെട്ടിടങ്ങളാണ്​ ഇവിടെയുള്ള കെട്ടിടങ്ങൾ. ഭാവിയിൽ ഇത്​ സ്വകാര്യ ഉടമകൾക്കും സ്വന്തമാക്കാൻ അവസരം ലഭിക്കും.

വിൽപനക്കും പാട്ടത്തിനുമെല്ലാം കെട്ടിടങ്ങൾ കൈമാറും. ചില കെട്ടിടങ്ങളുടെ വിൽപന വൈകാതെ നടക്കും. ഘട്ടംഘട്ടമായ പദ്ധതികളിലൂടെയാവും നഗരം പൂർത്തിയാക്കുക. ആദ്യഘട്ടം 2023 മാർച്ചിനു​ മുമ്പ്​​ തുറക്കും.

എക്​സ്​പോക്കു​വേണ്ടി പ്രത്യേകം നിർമിച്ച ഭാഗങ്ങൾ മാത്രമാണ്​ പൊളിച്ചുമാറ്റുക.