വളർച്ചാക്കുതിപ്പിൽ യാമ്പു തുറമുഖം

യാമ്പു: യാമ്പുവിലെ കിങ്​ ഫഹദ് വ്യാവസായിക തുറമുഖം റെക്കോഡ്​ നേട്ടങ്ങളുമായി ശ്രദ്ധേയമാകുന്നു. പ്രവർത്തനങ്ങൾ ഉൗർജിതമാക്കി ഗണ്യമായ വളർച്ചാക്കുതിപ്പിലാണ് യാമ്പു തുറമുഖം. ഒരേ സമയം16 കപ്പലുകൾ അടുപ്പിച്ചതും 10 കപ്പലുകൾ പ്രവേശന അനുമതിക്കായി കാത്തിരിക്കുകയും ചെയ്യുന്നത് ഈയിടെയാണ്​ റിപ്പോർട്ട്​ ചെയ്യപ്പെട്ടത്​. ഇത്രയും കപ്പലുകൾ ഒന്നിച്ച്​ കൈകാര്യം ചെയ്യുകവഴി തുറമുഖത്തി​​​െൻറ ശേഷിയാണ്​ തെളിയിക്കപ്പെടുന്നത്​. വിഷൻ 2030 ​​​െൻറ ലക്ഷ്യങ്ങൾ പൂർത്തിയാക്കുവാൻ സൗദി ജനറൽ പോർട്ട് അതോറിറ്റി നീക്കങ്ങൾ ആരംഭിച്ചിട്ടുണ്ട്​.

സ്വദേശി നിക്ഷേപകർക്ക് ധാരാളം അവസരങ്ങൾ നൽകാനും യുവാക്കൾക്ക് തുറമുഖ മേഖലയിൽ തൊഴിൽ സൃഷ്​ടിക്കാനും ഇതുവഴി സാധിക്കുമെന്ന് ബന്ധപ്പെട്ടവർ കണക്ക് കൂട്ടുന്നു. യാമ്പു തുറമുഖത്തിൽ നിലവിൽ പ്രതിവർഷം 210 ദശലക്ഷം ടൺ ചരക്ക്​ കൈകാര്യം ചെയ്യാനുള്ള സംവിധാനമുണ്ട്. കഴിഞ്ഞ ആറ് മാസ കാലാവധിയിൽ 24 ദശലക്ഷം ടൺ ഇറക്കുമതിയും 16 ദശ ലക്ഷം ടൺ കയറ്റുമതിയും ഇവിടെ നിന്ന് നേരത്തെ റിപ്പോർട്ട് ചെയ്തിരുന്നു. അന്താരാഷ്​​്ട്ര വിപണിയിലേക്ക് ആവശ്യമായ ക്രൂഡ് ഓയിൽ, പെട്രൊ കെമിക്കൽ ഉത്പന്നങ്ങൾ, മറ്റു അസംസ്കൃത വസ്തുക്കൾ എന്നിവ യാമ്പു തുറമുഖം വഴി കയറ്റി അയക്കുന്നുണ്ട്. തുറമുഖത്ത് അതിവേഗം ചരക്കുകൾ നീക്കം ചെയ്യാൻ സാധിക്കുന്ന തരത്തിൽ സാങ്കേതിക സൗകര്യങ്ങളും പരിഷ്​കരിച്ചിട്ടുണ്ട്​.