യാമ്പു റോയൽ കമീഷനിലെ വാണിജ്യമേള ശ്രദ്ധേയമാകുന്നു

യാമ്പു: ‘നിങ്ങളുടെ ഉപകരണം സ്വന്തമാക്കുക’ എന്ന ശീർഷകത്തിൽ വ്യവസായ നഗരിയിലെ യാമ്പു ടെക്നിക്കൽ ഇൻസ്​റ്റിറ്റ്യുട്ടിൽ നടന്നുവരുന്ന വാണിജ്യ വ്യവസായ പ്രദർശനം ശ്രദ്ധേയമാകുന്നു. കമീഷൻ സി. ഇ. ഒ ഡോ. അലാഅ ബിൻ അബ്​ദുല്ല നസീഫ് ഉദ്‌ഘാടനം ചെയ്ത പ്രദർശനം ദിവസേന വൈകുന്നേരം അഞ്ച്​ മുതൽ രാത്രി 10 വരെയാണ്. ഒക്ടോബർ 12 വരെ പ്രദർശനം തുടരും.

യാമ്പുവിലും മറ്റും അറിയപ്പെടുന്ന പ്രമുഖസ്ഥാപനങ്ങളും കമ്പനികളുമാണ് സ്​റ്റാളുകൾ ഒരുക്കിയിരിക്കുന്നത്. കാറുകൾ, ഇലക്ട്രിക്, ഇലക്ട്രോണിക്സ്, ഉപകരണങ്ങൾ വീട്ടുപകരണങ്ങൾ എന്നിവ മേളയിൽ പരിചയപ്പെടുത്തുന്നുണ്ട്. മെഡിക്കൽ ഉപകരണങ്ങളും ആരോഗ്യ സംരക്ഷണ വസ്​തുക്കളും ഭിന്നശേഷിക്കാർക്കാവശ്യമായ ആധുനിക സാമഗ്രികളും പ്രദർശനത്തിനും വിൽപനക്കും ഒരുക്കിയിട്ടുണ്ട്. റോയൽ കമീഷൻ ജീവനക്കാർക്കായി തവണ വ്യവസ്ഥയിൽ സാധനങ്ങൾ സ്വന്തമാക്കാൻ അവസരമുണ്ട്.

മേള ഉപയോഗപ്പെടുത്താൻ വിദേശികളടക്കം ധാരാളം പേർ സന്ദർശകരായുണ്ടെന്ന് സ്​റ്റാൾ ജീവനക്കാരനായ മണ്ണാർക്കാട് സ്വദേശി ഫൈറൂസ് ജഹാൻ പറഞ്ഞു. യാമ്പു റോയൽ കമീഷനിലെ ‘കോളജ് ആൻറ് ഇൻസ്​റ്റിറ്റ്യുട്ട്​സ്​ സെക്​ടർ’ ആണ് സംഘാടകർ. പ്രദർശനത്തോടനുബന്ധിച്ച് കുടുംബങ്ങൾക്കും കുട്ടികൾക്കും മത്സരങ്ങളും കലാസാംസ്കാരിക പരിപാടികളും ഒരുക്കിയിട്ടുണ്ട്. കുട്ടികൾക്ക് വിനോദത്തിനായി പ്രത്യേക പാർക്കും സംവിധാനങ്ങളും കൂടി നഗരിയിൽ ഒരുക്കിയതോടെ വൈകുന്നേരങ്ങളിൽഉത്സവ പ്രതീതിയാണിവിടെ.