ലോക പ്രശസ്​ത ന്യൂ ഹേവൻ യൂനിവേഴ്​സിറ്റി കാമ്പസ് റിയാദിലെ മിസ്ക് സിറ്റിയിൽ ആരംഭിക്കുന്നു; ഈ വർഷം തന്നെ പ്രവേശനം

റിയാദ്: പ്രശസ്​തമായ അമേരിക്കയിലെ ന്യൂ ഹേവൻ സർവകലാശാലയുടെ കാമ്പസ്​ സൗദി അറേബ്യയുടെ തലസ്ഥാനമായ റിയാദിൽ ആരംഭിക്കുന്നു. അമീർ മുഹമ്മദ് ബിൻ സൽമാൻ നോൺ-പ്രോഫിറ്റ് സിറ്റിയായ ‘മിസ്ക് സിറ്റി’യുമായി സഹകരിച്ചാണ് സർവകലാശാല പുതിയ കാമ്പസ് സ്ഥാപിക്കുന്നത്. മിസ്ക് നഗരത്തിനുള്ളിൽ പ്രവർത്തനം ആരംഭിക്കുന്ന ആദ്യത്തെ സർവകലാശാലാ കാമ്പസാണിത്. മിസ്ക് സിറ്റിയിലെ വിദ്യാഭ്യാസ-വിജ്ഞാന ആവാസവ്യവസ്ഥയെ ശക്തിപ്പെടുത്തുന്നതിനൊപ്പം നവീകരണം, നിർമിത ബുദ്ധി (എഐ), സംരംഭകത്വം തുടങ്ങിയ മേഖലകളിൽ ആഗോള നിലവാരത്തിലുള്ള പഠനസൗകര്യങ്ങൾ ഒരുക്കുകയാണ് ഈ പങ്കാളിത്തത്തിലൂടെ ലക്ഷ്യമിടുന്നത്.

ഇതിലൂടെ രാജ്യത്തെ യുവപ്രതിഭകളെ ശാക്തീകരിക്കാനും വിവിധ വിദ്യാഭ്യാസ സ്ഥാപനങ്ങളെ ഏകോപിപ്പിക്കാനും സാധിക്കുമെന്ന് മിസ്ക് സിറ്റി അധികൃതർ വ്യക്തമാക്കി. 2026-ലെ ശരത്കാല സെമസ്​റ്റർ മുതലായിരിക്കും സർവകലാശാലയിൽ വിദ്യാർത്ഥികൾക്ക് പ്രവേശനം നൽകി തുടങ്ങുക.

ആധുനിക തൊഴിൽ മേഖലകളിൽ ഏറെ സാധ്യതകളുള്ള വൈവിധ്യമാർന്ന ബിരുദ പ്രോഗ്രാമുകളാണ് ഇവിടെ ഒരുങ്ങുന്നത്. സംരംഭകത്വവും നവീകരണവും, ഇ-സ്പോർട്‌സ്, ഡിജിറ്റൽ ഗെയിമിംഗ് മാനേജ്‌മെന്റ്, മാർക്കറ്റിംഗ്, സ്‌പോർട്‌സ് മാനേജ്‌മെൻറ്​ എന്നിവയുൾപ്പെടെയുള്ള വിഷയങ്ങളിൽ വിദ്യാർത്ഥികൾക്ക് ഇവിടെ ബിരുദ പഠനം നടത്താം.

കൂടാതെ, ബിസിനസ് മേഖലയിലും ബിസിനസ് അഡ്മിനിസ്ട്രേഷനിലും ആർട്ടിഫിഷ്യൽ ഇൻറലിജൻസ് സാങ്കേതികവിദ്യ പ്രയോജനപ്പെടുത്തുന്ന പ്രത്യേക ബിരുദ പ്രോഗ്രാമുകളും സർവകലാശാല ലക്ഷ്യമിടുന്നുണ്ട്. സൗദി അറേബ്യയുടെ വിദ്യാഭ്യാസ പരിഷ്കരണങ്ങളുടെ ഭാഗമായി റിയാദിലെത്തുന്ന ഈ പ്രമുഖ വിദേശ സർവകലാശാല മേഖലയിലെ ഉന്നതവിദ്യാഭ്യാസ രംഗത്ത് വലിയ മാറ്റങ്ങൾ കൊണ്ടുവരുമെന്നാണ് പ്രതീക്ഷിക്കപ്പെടുന്നത്.