ലോകത്തെ ഏറ്റവും വലിയ  സൗരോർജ പാടം സൗദിയിൽ വരുന്നു

ജിദ്ദ: ലോകത്തെ ഏറ്റവും വിസ്​തൃതമായ സൗരോർജ പാടം നിർമിക്കാൻ നിർമിക്കാൻ സൗദി അറേബ്യയും സോഫ്​റ്റ്​ബാങ്കും കരാറിലെത്തി. അമേരിക്ക സന്ദർശിക്കുന്ന സൗദി കിരീടാവകാശി അമീർ മുഹമ്മദ്​ ബിൻ സൽമാനും സോഫ്​റ്റ്​ബാങ്ക്​ സി.ഇ.ഒ മസയോഷി സോനുമാണ്​ ധാരണാപത്രത്തിൽ ഒപ്പുവെച്ചത്​. 
2030 ഒാടെ 200 ജിഗാവാട്ട്​ വൈദ്യുതി ഉൽപാദിക്കാനാൻ കഴിയുന്ന ബൃഹത്തായ സോളാർ പ്ലാൻറ്​ ശൃംഖലയാണ്​ ആണ്​ പരിഗണനയിലുള്ളത്​. പദ്ധതി വ​ഴി തദ്ദേശീയ സോളാർ പ്ലാൻറ്​ ഉപകരണ നിർമാണ മേഖലയുടെ വ്യാപനവും ലക്ഷ്യമിടുന്നു. ആദ്യഘട്ടമെന്ന നിലയിൽ 2019 ഒാടെ മൂന്നു ജിഗാവാട്ടും 4.2 ജിഗാവാട്ടും ശേഷിയുള്ള രണ്ടുപ്ലാൻറുകൾ സൗദിയിൽ പ്രവർത്തനക്ഷമമാകും.

തുടർന്നുള്ള വിപുല പദ്ധതിയുടെ സാധ്യതാപഠനം ഇൗവർഷം മേയിൽ തന്നെ പൂർത്തിയാക്കും. എണ്ണയുടെ ആശ്രിതത്വത്തിൽ നിന്ന്​ സൗദിയുടെ സാമ്പത്തിക, ഉൗർജ രംഗങ്ങളെ വിമുക്​തമാക്കുകയെന്ന വിശാല ലക്ഷ്യത്തി​​​െൻറ അടിസ്​ഥാനത്തിലാണ്​ പദ്ധതികൾ തയാറാക്കുന്നത്​. വർഷം മുഴുവൻ സുലഭമായി സൂര്യപ്രകാശം ലഭിക്കുന്ന സൗദി അറേബ്യയുടെ ഇൗ നിലയിലുള്ള സാധ്യതകളെ പരമാവധി പ്രയോജനപ്പെടുത്തും. രണ്ടുലക്ഷം തൊഴിലവസരങ്ങളാകും സൗരോർജ മേഖല സൃഷ്​ടിക്കുക. വാർഷിക ആഭ്യന്തര ഉൽപാദനം 12 ശതകോടി ഡോളറായി വർധിപ്പിക്കാനുമാകും. പാരമ്പര്യ ഉൗർജ മേഖലയിൽ ചെലവഴിക്കുന്ന 40 ശതകോടി ഡോളർ പ്രതിവർഷം ഇതുവഴി ലാഭിക്കാനുമാകും.