വനിതകൾ അംഗീകൃത സ്​കൂളുകളിലേ ഡ്രൈവിങ്​ പഠിക്കാവൂ

റിയാദ്​: ​​സ്​ത്രീകൾക്ക്​ ഡ്രൈവിങിന്​ അനുമതി നൽകിയ പശ്ചാത്തലത്തിൽ ഡ്രൈവിങ്​ പഠിപ്പിക്കാമെന്നും തൊഴിലവസരം നൽകാമെന്നും വാഗ്​ദാനം നൽകി ചൂഷണം ചെയ്യാൻ രംഗത്തുവരുന്നവരെ കരുതിയിരിക്കണമെന്ന്​ ട്രാഫിക്​ ഡയക്​ടറേറ്റ്​  വക്​താവ്​ കേണൽ ത്വാരിഖ്​ അൽറുബയ്​ആൻ മുന്നറിയിപ്പ്​ നൽകി. ‘യാ ഹലാ’ എന്ന ടെലിവിഷൻ പരിപാടിയിലാണ്​ സ്​ത്രീകളോട്​ ഇക്കാര്യം ട്രാഫിക്​ വക്​താവ്​ ഉണർത്തിയത്​.  അംഗീകൃത സ്​ഥാപനങ്ങളിലൂടെ മാത്രമേ ഡ്രൈവിങ്​ പഠിക്കാവൂ. അഗീകൃത ഡ്രൈവിങ്​ സ്​ഥാപനങ്ങൾ ഏതൊക്കെയെന്ന്​ ഉടനെ പരസ്യപ്പെടുത്തും.

കിഴക്കൻ മേഖലയിൽ സ്​ത്രീകൾക്ക്​ ഡ്രൈവിങ്​ പഠിപ്പിച്ച അനധികൃത സ്​ഥാപനങ്ങൾ പിടിയിലായിട്ടുണ്ട്​. സ്​ത്രീകൾക്ക്​ ഡ്രൈവിങ്​ പഠിപ്പിക്കുന്നതിന്​ പ്രത്യേക സ്​കൂളുകൾ ആഭ്യന്തരം, ധനകാര്യം, തൊഴിൽ എന്നീ വകുപ്പുകളുൾപ്പെട്ട സംയുക്​ത സമിതി റിപ്പോർട്ട്​ വന്ന്​ ഒരു മാസത്തിനുള്ളിൽ ആരംഭിക്കും. സാധാരണ തുടർന്നു വരുന്ന നടപടികളായിരിക്കും സ്​ത്രീകൾക്ക്​ ഡ്രൈവിങ്​ ലൈസൻസ്​ നേടുന്നതിനുണ്ടാകുക. തിയറി, പ്രാക്​ടിക്കൽ എന്നിങ്ങനെ രണ്ട്​ ഘട്ടങ്ങളുണ്ടാകും. കണ്ണ്​, രക്​തം എന്നീ പരിശോധനകളുമുണ്ടാകും. അംഗീകാരം ലഭിക്കാതെ സ്​ത്രീകളെ ഡ്രൈവിങ്​ പഠിപ്പിക്കുന്ന സ്​കൂളുകൾക്കെതിരെ നടപടി സ്വീകരിക്കും.