വാഹന മേഖലയില്‍ 208 ദശലക്ഷം റിയാല്‍ വനിതാ നിക്ഷേപത്തിന് സാധ്യത

റിയാദ്: സൗദിയില്‍ സ്ത്രീകള്‍ക്ക് വാഹനമോടിക്കാന്‍ അനുമതി ലഭിച്ച സാഹചര്യത്തില്‍ ഈ രംഗത്ത് വനിതകളുടെ നിക്ഷേപ, തൊഴില്‍ സാധ്യത ആരായുന്നതിനായി റിയാദ് ചേംബറിന് കീഴില്‍ പ്രത്യേക കമ്മിറ്റി രൂപവത്​കരിച്ചു. ഡ്രൈവിങ് സ്കൂള്‍, വാഹനം മോടി കൂട്ടാനുള്ള വസ്തുക്കള്‍, സേവനം തുടങ്ങി വിവിധ മേഖലയില്‍ 208 ദശലക്ഷം റിയാലി​​െൻറ മുതല്‍മുടക്കിന് സാധ്യതയുണ്ടെന്ന് കമ്മിറ്റി വ്യക്തമാക്കി. സൗദി വിഷന്‍ 2030​​െൻറ ഭാഗമായി സ്വദേശി വനിതകള്‍ക്ക് കൂടുതല്‍ തൊഴിലവസരങ്ങള്‍ സൃഷ്​ടിക്കാനും വാഹന മേഖലയില്‍ പുതിയ അവസരം തുറക്കും. സ്ത്രീകളുടെ ഡ്രൈവിങ് സ്കൂളുകള്‍ രാജ്യത്തി​​െൻറ എല്ലാ ഭാഗത്തും തുറന്നുപ്രവര്‍ത്തിക്കുന്നതിലൂടെ ഈ രംഗത്തെ നിക്ഷേപം സജീവമാവും. കൂടുതല്‍ പേര്‍ക്ക് ജോലി ലഭിക്കാനും ഇത് കാരണമാവും. നിലവില്‍ സ്കൂള്‍, കോളജ് വിദ്യാര്‍ഥിനികളുടെ  വാഹനങ്ങളില്‍ പരുഷന്മാരാണ് ഡ്രൈവര്‍മാർ. പെണ്‍കുട്ടികളുടെ സ്കൂളുകളിലേക്ക് സാധനങ്ങള്‍ എത്തിക്കുന്നതും പുരുഷന്മാരാണ്. ഈ ജോലികള്‍ സ്ത്രീകള്‍ക്ക്  ഏറെ അനുയോജ്യമാണ്. വാഹനങ്ങളിലെ ആക്​സസറീസ്​ മേഖല സ്ത്രീകള്‍ക്ക് ഏറെ ലാഭസാധ്യതയുള്ള വാണിജ്യരംഗം തുറന്നുകൊടുക്കും. വാഹനങ്ങളുടെ വർക്​ഷോപ്പുകളും സ്ത്രീകള്‍ക്ക് ആരംഭിക്കാവുന്ന പുതിയ സംരംഭമാണെന്ന് കമ്മിറ്റി അഭിപ്രായപ്പെട്ടു.