ശൈത്യം ഇത്തവണ ‘കടുക്കി’ല്ലെന്ന്​ വിദഗ്​ധർ

ജിദ്ദ: നേരത്തെ കരുതപ്പെട്ടിരുന്നത്​ ​േപാലെ ഇത്തവണത്തെ ശൈത്യം കാഠിന്യമേറിയതായിരിക്കില്ലെന്ന്​ വിദഗ്​ധർ. ഇത്തവണ കടുത്ത ശൈത്യകാലമാണ്​ സൗദിഅറേബ്യയെ കാത്തിരിക്കുന്നതെന്ന്​ നേരത്തെ പ്രവചനങ്ങളുണ്ടായിരുന്നു. താരതമ്യേന നീണ്ട കഴിഞ്ഞ വർഷത്തെ ശൈത്യകാലം അവസാനത്തോട്​ അടുപ്പിച്ച്​ കടുത്തിരുന്നു. സമാന അവസ്​ഥയാകും ഇത്തവണയെന്നായിരുന്നു കരുതപ്പെട്ടിരുന്നത്​. 

എന്നാൽ, നിലവിലുള്ള മേഘപടലങ്ങളും കാറ്റി​​െൻറ സഞ്ചാരവും നൽകുന്ന സൂചന വെച്ച്​ മിതമായ ശൈത്യകാലമായിരിക്കുമെന്നാണ്​ കാലാവസ്​ഥ നിരീക്ഷകനും അറബ്​ യൂനിയൻ ​േഫാർ അസ്​ട്രോണമി ആൻഡ്​ സ്​പേസ്​ സയൻസ്​ അംഗവുമായ ഖാലിദ്​ അൽസഅഖ്​ നിരീക്ഷിക്കുന്നത്​. ‘മർബാനിയ’ എന്നറിയപ്പെടുന്ന കൂടിയ തണുപ്പി​​െൻറ ‘40 ദിനങ്ങൾ’ ഡിസംബർ ആദ്യം തുടങ്ങി ജനുവരിയിൽ അവസാനിക്കും. രാജ്യത്തി​​െൻറ ഉത്തര, ഉത്തര പശ്​ചിമ മേഖലകളിലും അൽജൗഫ്​, ഹാഇൽ പ്രവിശ്യകളിലും പതിവുപോലെ പൂജ്യത്തിന്​ താഴേക്ക്​ താപനില താഴും. ഇത്​ ഇൗ പ്രദേശങ്ങളിൽ സാധാരണയാണ്​. ഖസീം, റിയാദ്​ പ്രവിശ്യകളിലും സാമാന്യം നല്ല തണുപ്പ്​ അനുഭവപ്പെടും.

‘മർബാനിയ’ കാലത്തി​​െൻറ മധ്യത്തോടെ മഴയും പ്രതീക്ഷിക്കാം. കഴിഞ്ഞ ബുധനാഴ്​ച മുതൽ രാജ്യത്തി​​െൻറ വടക്ക്​ മേഖലകളിൽ നല്ല ശൈത്യം അനുഭവപ്പെടുന്നുണ്ട്​. തലസ്​ഥാന മേഖലയിലും തണുപ്പ്​ തുടങ്ങിക്കഴിഞ്ഞു. പടിഞ്ഞാറൻ പ്രവിശ്യയിൽ രണ്ടാഴ്​ച മുമ്പ്​ പെയ്​ത മഴക്ക്​ ശേഷം പ്രസന്നമായ കാലാവസ്​ഥയാണ്​.