ആഘോഷ പൂർവം ഇന്ത്യൻ ഹാജിമാർക്ക് സ്വീകരണം

മദീന: ഇന്ത്യയിൽ നിന്നുള്ള ഇൗ വർഷത്തെ ആദ്യ ഹജ്ജ്​ വിമാനം മദീനയിലിറങ്ങി. ന്യൂഡൽഹിയിൽ നിന്നായിരുന്നു ആദ്യ വിമാനം. ശനിയാഴ്​ച ഉച്ചക്ക്​ 1.50 നാണ്​ മദീന അന്താരാഷ്​ട്ര വിമാനത്താവളത്തിൽ വിമാനം എത്തിയത്​. ഇന്ത്യൻ അംബാസഡർ അഹമദ്​ ജാവേദ്​, ജിദ്ദയിലെ കോൺസുൽ ജനറൽ മുഹമ്മദ്​ നൂർ റഹ്​മാൻ ശൈഖ്​, ഡെപ്യൂട്ടി കോൺസുൽ ജനറലും ഹജ്ജ്​ കോൺസലുമായ മുഹമ്മദ്​ ശാഹിദ്​ ആലം, വിമാനത്താവള അധികൃതർ എന്നിവരുടെ നേതൃത്വത്തിൽ യാത്രക്കാരെ സ്വീകരിച്ചു. ആദ്യവിമാനത്തിൽ 410 തീർഥാടകരാണ്​​ ഉണ്ടായിരുന്നത്​. രണ്ടര വയസുകാരനായ മുഹമ്മദ്​ അനസാണ്​ ഏറ്റവും പ്രായം കുറഞ്ഞ തീർഥാടകൻ.

ശനിയാഴ്​ച മാത്രം 10 വിമാനങ്ങൾ ഇന്ത്യയുടെ വിവിധ നഗരങ്ങളിൽ നിന്ന്​ മദീനയിലെത്തി. മൊത്തം 234 സർവീസുകളാണ്​ മദീനയിലേക്ക്​ വരുന്നത്​. 67,302 യാത്രക്കാരാകും​​ മദീനയിൽ​ ഇറങ്ങുക. ന്യൂഡൽഹി, ഗയ, ഗോവ, ഗുവഹാത്തി, കൊൽക്കത്ത, ലക്​നോ, മംഗലാപുരം, ശ്രീനഗർ, വരാണസി എന്നിവിടങ്ങളിൽ നിന്നുള്ള വിമാനങ്ങളാണ്​ മദീനയിലെത്തുന്നത്​. 

ജൂലൈ 29 നാണ്​ ജിദ്ദയിലേക്കുള്ള ആദ്യ വിമാനം. ചെന്നൈയിൽ നിന്നുള്ള വിമാനത്തിൽ 420 തീർഥാടകരുണ്ടാകും. ആഗസ്​റ്റ്​ ഒന്നിന്​ കൊച്ചിയിൽ നിന്നാണ്​ കേരളത്തിൽ നിന്നുള്ള ആദ്യവിമാനം. ജിദ്ദയിൽ എത്തുക മൊത്തം 209 സർവീസുകളാണ്​. 61,400 ഹാജിമാർ ഇൗ വിമാനങ്ങളിലെത്തും. അഹമദാബാദ്​, ഒൗറംഗാബാദ്​, ബാംഗ്ലൂർ, ഭോപാൽ, ചെന്നൈ, കൊച്ചി, ഹൈദരാബാദ്​, ജയ്​പൂർ, മുംബൈ, നാഗ്​പൂർ, റാഞ്ചി എന്നിവിടങ്ങളിൽ നിന്നുള്ള വിമാനങ്ങളാകും ജിദ്ദയിൽ ഇറങ്ങുന്നത്​. ആഗസ്​റ്റ്​ 16 ന്​ ജയ്​പൂരിൽ നിന്നാണ്​​ അവസാന വിമാനം.