ഉപയോഗശൂന്യമായ കിണറുകളുടെ അപകടത്തെക്കുറിച്ച്​ മുന്നറിയിപ്പ്​

ജിദ്ദ: രാജ്യത്ത്​ ഉപയോഗശൂന്യവും ഉപേക്ഷിക്കപ്പെട്ടതുമായ കിണറുകളുടെ അപകടങ്ങളെക്കുറിച്ച് സൗദി​ പരിസ്ഥിതി വകുപ്പിന്‍റെ മുന്നറിയിപ്പ്​. മൊറോക്കോയിൽ ഒ​​രു കുട്ടി കിണറ്റിൽ വീണ്​ ദാരുണമായി മരിച്ച പശ്ചാത്തലത്തിലാണ്​​ പരിസ്ഥിതി വകുപ്പിന്‍റെ ആവർത്തിച്ചുള്ള മുന്നറിയിപ്പ്​. ഇങ്ങയുള്ള കിണറുകൾ ശ്രദ്ധയിൽപെട്ടാൽ വിവരമറിയിക്കണമെന്ന്​ വകുപ്പ്​ ആവശ്യപ്പെട്ടു.

ഉപയോഗശൂന്യമായ കിണറുകളിൽ വഴിയാത്രക്കാർ വീണ് അപകടത്തിലാകുന്നത്​ തടയുന്നതിന്​ വകുപ്പ്​ അതീവ പ്രാധാന്യമാണ്​ നൽകുന്നത്​. ജീവനും സ്വത്തിനും സുരക്ഷ ഉറപ്പാക്കാനും ജലസ്രോതസ്സുകളുടെ മലിനീകരണം പരിമിതപ്പെടുത്താനും ലക്ഷ്യമിട്ട്​ മന്ത്രാലയം ഇതു​വരെ വിവിധ പ്രദേശങ്ങളിലായി 2450 ഉപേക്ഷിക്കപ്പെട്ട കിണറുകൾ നികത്തിയിട്ടുണ്ടെന്ന്​ മന്ത്രാലയ വക്താവ്​ സ്വാലിഹ്​ ബിൻ ദഖീൽ പറഞ്ഞു.

രാജ്യത്തെ ഉപേക്ഷിക്കപ്പെട്ട കിണറുകൾ കണ്ടെത്തുകയും അവ നികത്തുകയും ചെയ്യുന്ന പദ്ധതിയുടെ ആദ്യഘട്ടം മന്ത്രാലയം പൂർത്തിയാക്കി​. രണ്ടാംഘട്ടം ആരംഭിക്കുന്നതിനായി ബന്ധപ്പെട്ട വകുപ്പുകളിലെ സംയുക്ത സമിതികളുമായി ഏകോപിച്ചു പ്രവർത്തിക്കുകയാണ്​​. 5000ത്തിലധികം കിണറുകൾ ലക്ഷ്യമിടുന്നതായി വക്താവ്​ പറഞ്ഞു. വിവിധ മേഖലകളിലെ മന്ത്രാലയത്തിന്‍റെ ശാഖകൾക്ക് ഉപേക്ഷിക്കപ്പെട്ട കിണറിനെക്കുറിച്ച് എന്തെങ്കിലും വിവരം ലഭിക്കുമ്പോൾ ബന്ധപ്പെട്ട പ്രദേശത്തെ ഉപേക്ഷിക്കപ്പെട്ട കിണറുകളുടെ കണക്കെടുപ്പിനുള്ള കമ്മിറ്റി നിർദിഷ്ട സ്ഥലം സന്ദർശിച്ച് കിണറിന്‍റെ അവസ്ഥയെയും അപകടത്തെയുംകുറിച്ച് റിപ്പോർട്ട് തയാറാക്കും.

പിന്നീട്​ ചുറ്റും മതിൽകെട്ടുക, അല്ലെങ്കിൽ നികത്തുക എന്നിവയിലൂടെ അപകടാവസ്ഥക്ക്​ പരിഹാരം കാണുന്നതായും വക്താവ്​ പറഞ്ഞു.