ഇന്ത്യൻ എംബസിയിൽ വിവിധ ഒഴിവുകൾ; അപേക്ഷ ക്ഷണിച്ചു

റിയാദ്​: ഓഫിസ്​ ബോയ്, ക്ലാർക്ക്​ തസ്​തികകളിലേക്ക്​ റിയാദിലെ ഇന്ത്യൻ എംബസി യോഗ്യരായ ഉദ്യോഗാർഥികളിൽനിന്ന്​ അപേക്ഷകൾ ക്ഷണിച്ചു. സൗദി അറേബ്യയിൽ റസിഡൻറ്​ പെർമിറ്റ്​ (ഇഖാമ) ഉള്ള ഇന്ത്യൻ പൗരർക്കാണ്​ അപേക്ഷിക്കാൻ അർഹത. ഓഫിസ്​ ബോയിയുടെ ഒന്നും ക്ലാർക്കിന്റെ രണ്ടും ഒഴിവുകളാണുള്ളത്​. 2400-72-3480-104-4520-136-5880 റിയാലാണ്​​ ഓഫിസ്​ ബോയിയുടെ ശമ്പള സ്​കെയിൽ.

ക്ലാർക്കിന്റേത്​ 4000-120-5800-174-7540-226-9800 റിയാലും. 10-ാം ക്ലാസ്​ പാസ്​, ഇംഗ്ലീഷ്​ പരിജ്ഞാനം എന്നിവയാണ്​ ഓഫിസ്​ ബോയിയുടെ അടിസ്ഥാന യോഗ്യത. അറബി ഭാഷാ പരിജ്ഞാനമുള്ളവർക്ക്​ മുൻഗണന. ബിരുദം, കമ്പ്യൂട്ടർ ഉപയോഗിക്കാനുള്ള വൈദഗ്​ധ്യം, ഇംഗ്ലീഷിൽ എഴുതാനും സംസാരിക്കാനുമുള്ള കഴിവ്​, അറബി ഭാഷാപരിജ്ഞാനം എന്നിവയാണ്​ ക്ലാർക്ക്​ തസ്​തികയിലേക്ക്​ വേണ്ട അടിസ്ഥാന യോഗ്യതകൾ. ഇരു തസ്​തികളിലെയും അപേക്ഷകർക്ക്​ 2024 ജൂൺ ഒന്നിന്​ 35 വയസിൽ കൂടാൻ പാടില്ല. എഴുത്തുപരീക്ഷയുടെയും അഭിമുഖത്തിന്റെയും അടിസ്ഥാനത്തിലാണ്​ തെരഞ്ഞെടുപ്പ്​. https://forms.gle/GnSGmeesvc8jNmLW8 എന്ന ലിങ്കിൽ അപേക്ഷിക്കാം.