ഉമ്മുകുൽസും സൗദിയിൽ പാടും; മരണത്തിന്​​ അരനൂറ്റാണ്ടിനുശേഷം

റിയാദ്​: അ​റബ്​ ലോകത്തെ ഇതിഹാസ ഗായിക ഉമ്മുകുൽസുമിനെ വീണ്ടും കാണാൻ സൗദി നിവാസികൾക്ക്​ അവസരമൊരുങ്ങുന്നു. ലോകത്തെ വിസ്​മയിപ്പിച്ച ആ മാസ്​മരനാദം മരണത്തിന്​ നാലരപ്പതിറ്റാണ്ടിനിപ്പുറം ഇവിടെ വീണ്ടും മുഴുങ്ങും. ഹോളോഗ്രാം പ്രൊജക്​ഷൻ സാ​േങ്കതിക വിദ്യയില​ൂടെ സൗദിയിൽ ആദ്യമായി ഉമ്മുകുൽസുമി​നെ പുനരവതരിപ്പിക്കുകയാണ്​​. ഉമ്മുകുൽസുമും ആദ്യമായാണ്​ ഹോളോഗ്രാം പ്രൊജക്​ഷനിൽ എത്തുന്നത്​. അടുത്തവർഷം നടക്കുന്ന പരിപാടിയുടെ വീഡിയോ ​ട്രെയ്​ലർ കഴിഞ്ഞ ദിവസം പുറത്തുവിട്ടിരുന്നു. ‘ഉമ്മുകുൽസും ഇൻ സൗദി അറേബ്യ’ എന്ന ഹാഷ്​ടാഗ്​ മണിക്കൂറുകൾക്കുള്ളിൽ ട്രെൻഡിങ്​ ആയിക്കഴിഞ്ഞു. പരിപാടിയുടെ വേദിയോ തിയതിയോ പ്രഖ്യാപിച്ചിട്ടില്ല.

എന്നിട്ടും വൻ പ്രതികരണമാണ്​ ആരാധകർക്കിടയിൽ ഉണ്ടായത്​. 50 വർഷത്തിലേറെ നീണ്ട മഹത്തായ സംഗീത ജീവിതത്തിനുടമയായ ഇൗജിപ്​ത്​ സ്വദേശി ഉമ്മുകുൽസുമിന്​ ഇന്നും വലിയ ആരാധകവൃന്ദമുണ്ട്​. ‘കിഴക്കി​​​െൻറ താരകം’ എന്ന്​ പുകഴ്​പെറ്റ അവർ പാടിയ നൂറുകണക്കിന്​ ഗാനങ്ങൾ ഇന്നും അറബികളുടെ ഇഷ്​ടഗാനങ്ങളിലുണ്ട്​. ‘അൽ അത്​ലാൽ’, ‘എൽഹുബ്ബു കുല്ലു’, ‘യാ സാലിമെനി’ , ‘ഹൈറാത്ത്​ അൽബി മഅക്​’ എന്നീ അനശ്വര ഗാനങ്ങൾ ഇപ്പോഴും ഹിറ്റ്​ ചാർട്ടുകളിൽ ഇടംപിടിക്കുന്നു. 1898 ൽ നൈൽ തടത്തിലെ ദാഖ്​ലിയയിൽ ജനിച്ച ഉമ്മുകുൽസും ചെറുപ്പത്തിലേ ​തന്നെ സംഗീതരംഗത്തേക്ക്​ കടക്കുകയായിരുന്നു. 20ാം നൂറ്റാണ്ടിലെ ഏറ്റവും പ്രശസ്​തയായ അറബ്​ വനിതകളിലൊന്നായി അവർ മാറിയത്​ പിൽക്കാല ചരിത്രം.

1944 ൽ അന്നത്തെ ഇൗജിപ്​തിലെ രാജാവായി ഫാറൂഖ്​ അവർക്ക്​ നിഷാൻ ഇ കമാൽ എന്ന പരമോന്നത ബഹുമതി നൽകി ആദരിച്ചു. 1967 ലെ ആറുദിന യുദ്ധത്തിന്​ ശേഷം ഉമ്മുകുൽസും പുറത്തിറക്കിയ ദേശാഭിമാന ഗാനങ്ങൾ അറബ്​ ലോകത്തെങ്ങും അലയടിച്ചു. 80 ദശലക്ഷം റെക്കോഡുകളാണ്​ അവരുടേതായി ഇതുവരെ വിറ്റുപോയിട്ടുള്ളത്​. 1975 ഫെബ്രുവരി മൂന്നിന്​ വൃക്ക രോഗത്തെ തുടർന്നാണ്​ അവർ മരിച്ചത്​. കൈറോയിൽ നടന്ന ഖബറടക്ക ചടങ്ങുകൾക്ക്​ അരക്കോടിയോളം പേർ പ​െങ്കടുത്തു. മരണത്തിന്​ പതിറ്റാണ്ടുകൾക്ക്​ ശേഷവും ഉമ്മുകുൽസുമി​ന്​ സൗദിയിൽ ഉൾപ്പെടെ വൻ സ്വീകാര്യതയുണ്ട്​. അതിനുള്ള തെളിവാണ്​ അവരുടെ പ്രത്യേക പരിപാടി പ്രഖ്യാപിച്ച്​ മണിക്കൂറുകൾക്കകം ഉണ്ടായ പ്രതികരണം.