മുൻവിധികൾ മാറ്റി മറിക്കാൻ ട്രംപ്​ സൗദിയിലേക്ക്​

ജിദ്ദ: ഡൊണാൾഡ്​ ട്രംപി​​​െൻറ സൗദി സന്ദർശനം ഇരു രാജ്യങ്ങൾക്കുമിടയിലെ ബന്ധം ഉൗഷ്​മളമാക്കുന്നതോടൊപ്പം മുസ്​ലീംലോകത്ത്​ നിലനിൽക്കുന്ന ‘​ട്രംപ്​ ഭീതി’ ഇല്ലാതാവുമെന്നും വിലയിരുത്തൽ.  അമേരിക്കന്‍ പ്രസിഡൻറ്​ ഡൊണാള്‍ഡ് ട്രംപ് ഇൗ മാസം അവസാനം സൗദി സന്ദര്‍ശിക്കുമെന്ന്​ അദ്ദേഹം തന്നെയാണ്​ കഴിഞ്ഞ ദിവസം  പ്രഖ്യാപിച്ചിരിക്കുന്നത്​. കഴിഞ്ഞ മാസം റിയാദിലെത്തിയ യു.എസ് പ്രതിരോധ സെക്രട്ടറി ജയിംസ് മാറ്റിസ് സൗദി അധികൃതരുമായി ട്രംപി​​​െൻറ സൗദി സന്ദർശനത്തെ കുറിച്ച്​ ചർച്ച നടത്തിയിരുന്നു. 

അമേരിക്കന്‍ പ്രസിഡൻറായി ചുമതലയേറ്റതിന് ശേഷം  ട്രംപ് നടത്തുന്ന പ്രഥമ വിദേശ സന്ദര്‍ശനം തുടങ്ങുന്നത്​ സൗദിയിൽ നിന്നാണ് എന്നാണ്​ റിപ്പോർട്ട്​. ട്രംപ്​ യുഗത്തെ കുറിച്ച മുൻവിധികൾ മാറ്റിമറിക്കുന്ന സന്ദർശനമാവുമിതെന്ന്​ നിരീക്ഷകർ വിലയിരുത്തുന്നു. സൗദി അറേബ്യ വളരെ താൽപര്യത്തോട്​ കൂടിയാണ്​ ട്രംപിനെ വരവേൽക്കാനൊരുങ്ങുന്നത്​. കഴിഞ്ഞ മാർച്ചിൽ​ വാഷിംങ്ടണില്‍ സന്ദര്‍ശനം നടത്തിയ അമീര്‍ മുഹമ്മദ് ബിന്‍ സല്‍മാന്‍ ട്രംപുമായി കൂടിക്കാഴ്​ച നടത്തിയിരുന്നു. ഒബാമ ഭരണത്തി​​​െൻറ അവസാന കാലത്ത് അകല്‍ച്ചയിലായ ഇരു രാജ്യങ്ങളും തമ്മിലുള്ള ബന്ധം ട്രംപി​​​​െൻറ  സന്ദര്‍ശനത്തോടെ ശക്തമാകുമെന്ന്​ അന്ന്​ തന്നെ വിലയിരുത്തപ്പെട്ടു. ഇരു രാജ്യങ്ങളും തമ്മിലുള്ള ഉഭയ കക്ഷിബന്ധം ശക്തിപ്പെടുത്തുന്നതിനോടൊപ്പം മേഖലയിലെ പ്രധാന സുരക്ഷ, രാഷ്​ട്രീയ വിഷയങ്ങളും ട്രംപി​​​െൻറ സൗദി സന്ദര്‍ശനത്തില്‍ ചര്‍ച്ചയാകുമെന്നാണ്​ പ്രതീക്ഷിക്കുന്നത്​.

ഐ.എസ് ഭീകരതെ ഇല്ലാതാക്കലും യമന്‍, സിറിയ പ്രശ്ന പരിഹാരവും പ്രധാന അജണ്ടയാവും. അതോടൊപ്പം അറബ് -ഇസ്​ലാമിക രാജ്യങ്ങളുമായുള്ള ബന്ധം ശക്തിപ്പെടുത്തലും  ട്രംപി​​​െൻറ സന്ദര്‍ശന ലക്ഷ്യമാണ്.തീവ്രവാദത്തിനെതിരായ ഇരു രാജ്യങ്ങളുടെയും പോരാട്ടം ശക്തിപ്പെടുത്തുന്നതാവും ട്രംപി​​​െൻറ സന്ദര്‍ശനമെന്ന് സൗദി വിദേശകാര്യ മന്ത്രി ആദില്‍ ജുബൈര്‍ പ്രതികരിച്ചിട്ടുണ്ട്​. ട്രംപി​​​െൻറ സൗദി സന്ദര്‍ശനം ഇരു രാജ്യങ്ങളും തമിലുള്ള ബന്ധത്തില്‍ വലിയ വഴിത്തിരിവാകും. അതോടൊപ്പം മേഖലയിലെ പ്രശ്ന പരിഹാരത്തിനുള്ള ശ്രമങ്ങള്‍ക്ക് സന്ദര്‍ശനം സഹായകരമാവും എന്നാണ്​ സൗദിയുടെ വിലയിരുത്തൽ.  മേഖലയിലെ എല്ലാ രാജ്യങ്ങളുമായും അമേരിക്ക നല്ല ബന്ധം ആഗ്രഹിക്കുന്നതിനാല്‍ അറബ്-ഗള്‍ഫ് രാഷ്​ട്ര തലവന്‍മാര്‍ പങ്കെടുക്കുന്ന പ്രത്യക ഉച്ചകോടിയും അമേരിക്കന്‍ പ്രസിഡൻറി​​​െൻറ  സാന്നിധ്യത്തില്‍ നടക്കാനും സാധ്യതയുണ്ട്. സൗദി സന്ദര്‍ശനത്തിന് ശേഷം ഇസ്രായേല്‍ കൂടി  അമേരിക്കന്‍ പ്രസിഡൻറ്​ സന്ദര്‍ശിക്കുമെന്നാണ്​ റിപ്പോർട്ട്. അതേ സമയം  സന്ദര്‍ശനം റിയാദിലേക്കാണോ ജിദ്ദയിലേക്കാണോ എന്ന് വ്യക്തമല്ല. സൽമാൻ രാജാവ്​ വേനലവധിയും റമദാനും ചെലവഴിക്കാൻ ജിദ്ദയിലെ കൊട്ടാരത്തിലാണുള്ളത്​.