സൗദിയുമായി മഹത്തായ സൗഹൃദം -ട്രംപ്​

വാഷിങ്​ടൺ: സൗദി അറേബ്യയുമായുള്ളത്​ മഹത്തായ സൗഹൃദമെന്ന്​ അമേരിക്ക​ൻ പ്രസിഡൻറ്​ ഡോണൾഡ്​ ട്രംപ്​. എക്കാലത്തെയും മികച്ച നിലയിലാണ്​ ഇരുരാഷ്​ട്രങ്ങളും തമ്മിലുള്ള ബന്ധം ഇപ്പോഴെന്നും സൗദി കിരീടാവകാശി അമീർ മുഹമ്മദ്​ ബിൻ സൽമാനെ ഒാവൽ ഒാഫീസിൽ സ്വീകരിക്കവേ അദ്ദേഹം പറഞ്ഞു.
വളരെ കുറഞ്ഞ സമയം കൊണ്ടുതന്നെ താനും അമീർ മുഹമ്മദും നല്ല സുഹൃത്തുക്കളായിയെന്നും ട്രംപ്​ കൂട്ടിച്ചേർത്തു. ഇരുരാജ്യങ്ങളും തമ്മിൽ ആഴമേറിയ ബന്ധമാണുള്ളതെന്ന്​ അമീർ മുഹമ്മദ്​ പ്രതികരിച്ചു. ഇരുരാജ്യങ്ങൾക്കും ഒന്നിച്ച്​ നിരവധി പ്രശ്​നങ്ങൾ കൈകാര്യം ചെയ്യാനും മറികടക്കാനുമാകും. 

മൂന്നാഴ്​ചയിലേറെ നീളുന്ന അമീർ മുഹമ്മദി​​​െൻറ അമേരിക്കൻ സന്ദർശനത്തിലെ സുപ്രധാന ഭാഗമാണ്​ ട്രംപുമായുള്ള കൂടിക്കാഴ്​ച. ചൊവ്വാ​ഴ്​ച പുലർച്ചെയാണ്​ അദ്ദേഹം അമേരിക്കയിലെത്തിയത്​. വാഷിങ്​ടൺ വിമാനത്താവളത്തിൽ അമേരിക്കയിലെ സൗദി അംബാസഡർ അമീർ ഖാലിദ്​ ബിൻ സൽമാൻ, യു.എസ്​ സ്​റ്റേറ്റ്​ ഡിപ്പാർട്ട്​മ​​െൻറ്​ പ്രതിനിധി സീൻ ഒാലിർ എന്നിവരുടെ നേതൃത്വത്തിൽ അദ്ദേഹത്തെ സ്വീകരിച്ചു. ട്രംപിന്​ പിന്നാലെ രാഷ്​ട്രീയ, നയതന്ത്ര, പ്രതിരോധ തലത്തിലുള്ള ഉന്നതരുമായി കിരീടാവകാശി കൂടിക്കാഴ്ച നടത്തും.

ഇറാ​​​െൻറ ആണവ നയം, മേഖലയില്‍ പ്രശനങ്ങള്‍ സൃഷ്​ടിക്കുന്ന തരത്തിലുള്ള ഇടപെടല്‍, ഖത്തര്‍ പ്രതിസന്ധിക്ക് പരിഹാരം, യമനില്‍ സമാധാനം പുനഃസ്ഥാപിക്കുന്നതില്‍ സൗദിയുടെ നേതൃത്വത്തിലുള്ള സഖ്യസേനയുടെ ദൗത്യം എന്നീ വിഷയങ്ങള്‍ കിരീടാവകാശി ട്രംപുമായി ചര്‍ച്ച ചെയ്യുമെന്ന്​ അറിയുന്നു. 
ആമസോൺ, ആപ്പിൾ, ഗൂഗ്​ളി​​​െൻറ മാതൃസ്​ഥാപനമായ ആൽഫബെറ്റ്​ എന്നിവയു​മായുള്ള വ്യാവസായിക ചർച്ചകളും രണ്ടാഴ്​ച നീളുന്ന സന്ദർശനത്തിലുണ്ട്​ ആമസോണിനും ആപ്പിളിനും സൗദി അറേബ്യയിൽ നേരിട്ടുള്ള പ്രവർത്തനാനുമതിക്കാണ്​ ചർച്ചകൾ പുരോഗമിക്കുന്നത്​. ആൽഫബെറ്റ്​ സൗദിയിൽ വിവിധയിടങ്ങളിൽ ഡാറ്റാസ​​െൻററുകൾ സ്​ഥാപിക്കാനാണ്​ ആലോചിക്കുന്നത്​.