Fast Train

ഹറമൈൻ അതിവേഗ ട്രെയിൻ സർവീസ്​ ഇന്നുമുതൽ
ആദ്യഘട്ടത്തിൽ പ്രതിവാരം എട്ട്​ സർവീസുകൾ

ജിദ്ദ: മക്ക^മദീന അതിവേഗ​​ ട്രെയിൻ വ്യാഴാഴ്​ച സർവീസ്​​ ആരംഭിക്കും. തുടക്കത്തിൽ വ്യാഴം, വെള്ളി, ശനി, ഞായർ ദിവസങ്ങളിലാണ്​ സർവീസ്​. മക്കയിൽ നിന്ന്​ മദീനയിലേക്കും തിരിച്ചുമായി ആഴ്​ചയിൽ എട്ട്​ സർവീസ്​ ആണുണ്ടാകുക. അടുത്ത വർഷം സർവീസുകളുടെ എണ്ണം കൂടും. മക്കയിൽ നിന്ന്​ മദീനയിലേക്കും തിരിച്ചും നേരിട്ടുള്ള സർവീസുകളും ജിദ്ദ, കിങ്​ അബ്​ദുല്ല ഇക്കണോമിക്​ സിറ്റി സ്​റ്റേഷനുകളിൽ നിർത്തികൊണ്ടുള്ള സർവീസുകളും ഏർപ്പെടുത്തിയിട്ടുമുണ്ട്​. ആദ്യത്തെ രണ്ട്​ മാസം ടിക്കറ്റിന്​ പകുതി നിരക്കാണ്​. ബുക്കിങിന്​ www.hhr.sa എന്ന ലിങ്കും കസ്​റ്റമർ സർവീസിന്​ 920004433 എന്ന നമ്പറും ഒരുക്കി​.
യാത്രസമയം, ടിക്കറ്റ്​ ചാർജ്​​ എന്നിവ സംബന്ധിച്ച്​ ഇൗ നമ്പറിലുടെ ​അന്വേഷിക്കാം. മക്ക, മദീന, ജിദ്ദ, കിങ്​ അബ്​ദുല്ല ഇക്കണോമിക്​ സിറ്റി എന്നിവിടങ്ങളിലെ സ്​റ്റേഷനുകളിൽ ടിക്കറ്റ്​ ബുക്കിങിനും വാങ്ങുന്നതിനും സൗകര്യമുണ്ടാകുമെന്ന്​ ഹറമൈൻ റെയിൽവേ നേരത്തെ വ്യക്​തമാക്കിയിരുന്നു​.
കഴിഞ്ഞമാസം 25 ന്​ ജിദ്ദയിൽ നിന്ന്​ മദീന വരെ യാത്ര ചെയ്​ത്​ സൗദി ഭരണാധികാരി സൽമാൻ രാജാവാണ്​ ഹറമൈൻ ട്രെയിൻ സർവീസ്​ ഉദ്​ഘാടനം ചെയ്​തത്​. ഒക്​ടോബർ നാലിന്​ സർവീസ്​ ആരംഭിക്കുമെന്ന്​ ​നേരത്തെ അറിയിച്ചിരുന്നുവെങ്കിലും പദ്ധതി പ്രവർത്തിപ്പിക്കുന്ന സ്​പാനിഷ്​ അലയൻസ്​ കമ്പനിയുടെ റിപ്പോർട്ടി​​​െൻറ അടിസ്​ഥാനത്തിൽ ഒക്ടോബർ 11 ലേക്ക്​ മാറ്റുകയായിരുന്നു. യാത്രക്കാരെ സ്വീകരിക്കാൻ സ്​റ്റേഷനുകളിൽ ഒരുക്കം പൂർത്തിയായതായി റെയിൽവേ അധികൃതർ പറഞ്ഞു.
ഇക്കണോമി, ബിസിനസ്​​ ക്ലാസുകളാണുള്ളത്​. ബുക്കിങ്​ രംഗത്ത്​ നല്ല തിരക്കാണ്​.
മക്കയിൽ നിന്ന്​ മദീനയിലേക്കും തിരിച്ചുമുള്ള യാത്രക്ക്​ ഇക്കണോമി ക്ലാസിന്​ 150 റിയാലും ബിസിനസ്​ ക്ലാസിന്​ 250 റിയാലുമാണ്​ നിരക്ക്​. ഹറമൈൻ ട്രെയിൻ സർവീസ്​ ആരംഭിച്ചതോടെ മധ്യപൗരസ്​ത്യദേശത്തെ ഏറ്റവും വലിയ ഇലക്​ട്രിക്​ റെയിൽവേ പദ്ധതിയാണ്​ യാഥാർഥ്യമായത്​​. സൗദിയിലെ ആദ്യ എക്​സ്​പ്രസ്​ ട്രെയിൻ സർവീസുമാണ്​. സ്വദേശികൾക്കും വിദേശികൾക്കും മാത്രമല്ല, ലക്ഷക്കണക്കിന്​ ഹജ്ജ്​ ഉംറ യാത്രക്കാർക്കും പദ്ധതി ഉപകാരപ്പെടും. 2011 ൽ നിർമാണം ആരംഭിച്ച പദ്ധതി ഏകദേശം എട്ട്​ വർഷമെടുത്താണ്​ പൂർത്തിയാക്കിയത്​.
450 കിലോമീറ്റർ ആണ് പാതയുടെ​ ആകെ ദൈർഘ്യം. അഞ്ച്​ സ്​റ്റേഷനുകളിലും യാത്രക്കാർക്ക്​ വേണ്ട എല്ലാ സജ്ജീകരണങ്ങളും ഒരുക്കിയിട്ടുണ്ട്​. മൊത്തം 35 ഒാളം ട്രെയിനുകളാണ്​ പദ്ധതിക്ക്​ കീഴിലുള്ളത്​​.
മുഴുവൻ ട്രെയിനുകളും പ്രവർത്തിപ്പിക്കുന്നതോടെ ഒരു ദിവസം 1,60,000 പേർക്കും വർഷത്തിൽ ഏകദേശം 60 ദശലക്ഷം പേർക്കും യാത്ര ചെയ്യാനാകും.