റിജാൽ അൽമാഅ്​ ടൂറിസം മേധാവി സന്ദർശിച്ചു

അബ്​ഹ: അസീർ മേഖലയിലെ പൈതൃക ഗ്രാമമായ ഖർയത്ത്​ റിജാൽ അൽമാഅ്​ൽ നടപ്പിലാക്കിവരുന്ന വികസന പ്രവർത്തനങ്ങൾ ടൂറിസം പുരാവസ്​തു കമീഷൻ മേധാവി അമീർ സുൽത്താൻ ബിൻ സൽമാൻ പരിശോധിച്ചു. പദ്ധതി നടപ്പിലാക്കാൻ ചുമതലപ്പെടുത്തിയ സംഘവുമായി ടൂറിസം മേധാവി കൂടിക്കാഴ്​ച നടത്തി. യുനസ്​കോ പൈതൃക പട്ടികയിൽ ഇടം നേടുന്നതിനാണ്​ അടിയന്തിര വികസന പ്രവർത്തനങ്ങൾ നടപ്പിലാക്കുന്നത്​. നടപടികൾ പൂർത്തിയായാൽ യുനസ്​കോയിൽ ഇടം നേടുന്ന രാജ്യത്തെ ആറാമത്തെ പൈതൃക സ്​ഥലമായി റിജാൽ അൽമാഅ്​ ഗ്രാമം മാറും. വേറിട്ട ടൂറിസ്​റ്റ് രാജ്യമാകാൻ വേണ്ട പ്രവർത്തനങ്ങളാണ്​ സൗദിയിൽ നടന്നുവരുന്നതെന്ന്​ ടൂറിസം മേധാവി പറഞ്ഞു. കഴിഞ്ഞ ഏതാനും വർഷങ്ങളായി ഇതിനായി വിവിധ പദ്ധതികൾ നടപ്പിലാക്കി വരികയാണ്​. തൊഴിലവസരങ്ങൾക്കും സാമ്പത്തിക വരുമാനത്തിനും പ്രധാന സ്രോതസ്സായി ടൂറിസം മാറിക്കഴിഞ്ഞിരിക്കുന്നു.
നിരവധി പേർക്കാണ്​ നേരിട്ടും അല്ലാതെയും തൊഴിലവസരങ്ങൾ ലഭിക്കുന്നത്​. അസീർ മേഖലയെ പ്രധാന ടൂറിസം മേഖലയാക്കി മാറ്റാൻ ടൂറിസം വകുപ്പ്​ അതീവശ്രദ്ധ ചെലുത്തിയിട്ടുണ്ട്​. വർഷം മുഴുവൻ വിവിധ ടൂറിസം പരിപാടികളാണ്​ ഇതിനായി ആസൂത്രണം ചെയ്​തു നടപ്പിലാക്കി കൊണ്ടിരിക്കുന്നതെന്നും അദ്ദേഹം പറഞ്ഞു.അസീർ മേഖല ഡെപ്യൂട്ടി ഗവർണർ അമീർ തുർക്കി ബിൻ ത്വലാൽ ടൂറിസം മേധാവിയെ അനുഗമിച്ചു.