ഒമാനിൽ ബീച്ചിൽ മുങ്ങി മരിച്ച തൃശൂർ സ്വദേശിയുടെ മൃതദേഹം നാട്ടിലെത്തിക്കും

മസ്കത്ത്​: സുഹൃത്തുക്കളോടൊപ്പം കുളിക്കുന്നതിനിടെ മുങ്ങിമരിച്ച തൃശൂർ സ്വദേശിയുടെ മൃതദേഹം നാട്ടിലെത്തിക്കുമെന്ന്​ ബന്ധപ്പെട്ടവർ അറിയിച്ചു. വേലൂരിലെ ഒല​ക്കേങ്കിൽ വീട്ടിൽ ​യേശുദാസനാണ് (51) തെക്കൻ ബാത്തിന ഗവർണ​റേറ്റ് ബർക്ക വിലായത്തിലെ സവാദി ബീച്ചിൽ ഞായറാഴ്ച മുങ്ങിമരിച്ചത്​.

രണ്ടുപേർ മുങ്ങിത്താഴുന്നത്​ ശ്രദ്ധയിൽപെട്ട്​ രക്ഷിക്കാൻ ഇറങ്ങിയ ഇദ്ദേഹവും അപകടത്തിൽപെടുകയായിരുന്നു. സിവിൽ ഡിഫൻസിന്‍റെയും നാട്ടുകാരുടെയും നേതൃത്വത്തിൽ കരക്കെത്തിച്ച്​ മുസന്ന ആശുപത്രിയിൽ എത്തിച്ചെങ്കിലും മരിച്ചിരുന്നു. മൃതദേഹം റുസ്​താഖ്​ ആശുപത്രിയിൽ. നടപടിക്രമങ്ങൾ പൂർത്തിയാക്കി രണ്ടു​ ദിവസത്തിനകം മൃതദേഹം നാട്ടിലെത്തിക്കുമെന്ന്​ ബന്ധപ്പെട്ടവർ അറിയിച്ചു. ബർക്കയിൽ 30 വർഷത്തിലധികമായി ടയർ ഷോപ്​ നടത്തിവരുകയായിരുന്നു.

പിതാവ്​: ദേവസ്യ. മാതാവ്​: റോസ. ഭാര്യ: സിന്ധു. മക്കൾ: സ്​നേഹ, സാന്ദ്ര, അനു. മരുമകൻ: നിക്സൺ