സൗദിയിൽ വിദേശ നിയമ സ്ഥാപനങ്ങൾക്ക് ലൈസൻസ് നൽകി തുടങ്ങി

ജിദ്ദ: വിദേശ നിയമ സ്ഥാപനങ്ങൾക്ക് സൗദി അറേബ്യയിൽ പ്രവർത്തിക്കാനുള്ള ലൈസൻസ് നൽകി തുടങ്ങി. ഒരു കൂട്ടം അന്താരാഷ്​ട്ര നിയമജ്ഞരുടെ പങ്കാളിത്തത്തോടെ റിയാദിൽ നടന്ന അന്താരാഷ്​ട്ര നീതിന്യായ ​സമ്മേളനത്തോടനുബന്ധിച്ചാണ്​ വിദേശ നിയമ സ്ഥാപനങ്ങൾക്ക്​ സൗദിയിൽ തൊഴിൽ ചെയ്യുന്നതിനുള്ള ലൈസൻസ്​ അനുവദിക്കുന്നതിന്​ തുടക്കം കുറിച്ചത്​​. ഹെർബർട്ട് സ്മിത്ത് ഫ്രീഹിൽസ്, ലിഥം ആൻഡ്​ വാട്ട്കിൻസ്, ക്ലിഫോർഡ് ചാൻസ് എന്നീ കമ്പനികൾക്ക്​ നീതിന്യായ മന്ത്രി ഡോ. വാലിദ് അൽസംആനി, നിക്ഷേപ മന്ത്രി എൻജി. ഖാലിദ് അൽഫാലിഹ് എന്നിവരാണ്​ ലൈസൻസ്​ കൈമാറിയത്​.

വക്കീൽ​ ജോലി വ്യവസ്ഥകളിലെ ഭേദഗതികൾക്ക് മന്ത്രിസഭാ യോഗത്തിന്റെ അംഗീകാരം ലഭിച്ചതിനുശേഷമാണ്​ അന്താരാഷ്​ട്ര നിയമ സ്ഥാപനങ്ങൾക്ക്​ സൗദിയിൽ പ്രവർത്തിക്കാനുള്ള ലൈസൻസുകൾ നൽകാൻ തുടങ്ങിയത്​. വിദേശ നിയമ സ്ഥാപനങ്ങളുടെ ലൈസൻസ് നിയന്ത്രിക്കുന്നതിന്​ നടപ്പാക്കേണ്ട ചട്ടങ്ങൾക്ക് നീതിന്യായ മന്ത്രി നേരത്തെ അംഗീകാരം നൽകിയിരുന്നു. നിയമ തൊഴിൽ വികസിപ്പിക്കുക, അതി​െൻറ പ്രാക്ടീഷണർമാരുടെ കാര്യക്ഷമത വർധിപ്പിക്കുക, രാജ്യത്തെ ബിസിനസ്, നിക്ഷേപ അന്തരീക്ഷം മെച്ചപ്പെടുത്തുക എന്നിവയാണ് ഇതിലൂടെ ലക്ഷ്യമിടുന്നത്.