മൂന്നാമത്​ അറബ്​ ഗൾഫ്​ സുരക്ഷ സൈനികാഭ്യാസം: ജി.സി.സി നേതാക്കൾ സൗദിയിലെത്തി

ജിദ്ദ: മൂന്നാമത്​ അറബ്​ ഗൾഫ്​ സുരക്ഷ സൈനികാഭ്യാസത്തിന്‍റെ സമാപന ചടങ്ങിൽ പങ്കെടുക്കാൻ ജി.സി.സി രാജ്യങ്ങളിലെ ആഭ്യന്തര മന്ത്രിമാരും മറ്റ്​ ഉന്നതരും സൗദി കിഴക്കൻ പ്രവിശ്യയിലെത്തി. യു.എ.ഇ ഉപപ്രധാനമന്ത്രിയും ആഭ്യന്തര മന്ത്രിയുമായ ലെഫ്റ്റനൻറ്​ ജനറൽ ശൈഖ്​ സെയ്ഫ് ബിൻ സായിദ് അൽ നഹ്​യാൻ, ഒമാൻ ആഭ്യന്തര മന്ത്രി ഹമൂദ് ബിൻ ഫൈസൽ അൽ ബുസഈദി തുടങ്ങിയവർ എത്തിയവരിലുൾപ്പെടും.

ദഹ്​റാൻ കിങ്​ അബ്​ദുൽ അസീസ്​ എയർബേസിലെത്തിയ ഇരുവരെയും സൗദി ആഭ്യന്തര മന്ത്രി അമീർ അബ്​ദുൽ അസീസ്​ ബിൻ നാഇഫ്​​ സ്വീകരിച്ചു. കിഴക്കൻ പ്രവിശ്യാ ഡെപ്യൂട്ടി ഗവർണർ അമീർ അഹമ്മദ് ബിൻ ഫഹദ് ബിൻ സൽമാൻ, ജി.സി.സി സഹകരണ കൗൺസിൽ സെക്രട്ടറി ജനറൽ ഡോ. നാഇഫ് ഫലാഹ് മുബാറക് അൽഹജ്‌റഫ്​ തുടങ്ങിയവരും സന്നിഹിതരായിരുന്നു.

ബഹ്‌റൈൻ ആഭ്യന്തര മന്ത്രി ലെഫ്റ്റനൻറ്​ ജനറൽ ശൈഖ്​ റാഷിദ് ബിൻ അബ്ദുല്ല അൽഖലീഫയെ ആഭ്യന്തര ഡെപ്യൂട്ടി മന്ത്രി ഡോ. നാസർ ബിൻ അബ്ദുൽ അസീസ് അൽ ദാവൂദ് ആണ്​ സ്വീകരിച്ചത്​. ഖത്തറിലെ ആഭ്യന്തര മന്ത്രാലയം അണ്ടർ സെക്രട്ടറി മേജർ ജനറൽ അബ്ദുൽ അസീസ് ബിൻ ഫൈസൽ അൽതാനിയും കുവൈത്ത്​ ആഭ്യന്തര മന്ത്രാലയം അണ്ടർ സെക്രട്ടറി മേജർ ജനറൽ അൻവർ അബ്ദുല്ലത്തീഫ് അൽ ബർജാസും ശനിയാഴ്​ച രാവിലെ എത്തിയിട്ടുണ്ട്​. ഇരുവരെയും ആഭ്യന്തര മന്ത്രാലയം അണ്ടർ സെക്രട്ടറി ഡോ. ഹിഷാം അൽഫാഹിഹ്​ ആണ്​ സ്വീകരിച്ചത്​.