ഫ്രാങ്കോസ് സൂപ്പർ കപ്പ് ഫുട്​ബാളിന് തുടക്കം

ദമ്മാം: സൽക്കാര മലബാർ യുനൈറ്റഡ് എഫ്.സി സംഘടിപ്പിക്കുന്ന 'ടി.എസ്.എസ് അഡ്വർടൈസിങ്​-ഫ്രാങ്കോസ് സൂപ്പർ കപ്പ് ഫുട്​ബാൾ ടൂർണമെന്‍റിന് ദമ്മാമിൽ തുടക്കം. മലബാർ യുനൈറ്റഡ്​ എഫ്​.സിയുടെ സ്ഥാപകനും ദമ്മാമിലെ കാൽപന്ത് മൈതാനങ്ങളിലെ നിറസാന്നിധ്യവുമായിരുന്ന ഫ്രാങ്കോ ജോസിനെ ആദരിക്കുന്നതിനാണ്‌ ഫ്രാങ്കോസ് സൂപ്പർ കപ്പ് സംഘടിപ്പിക്കുന്നത്​.

ദോഹ ഗ്രൗണ്ടിൽ ദമ്മാം ഇന്ത്യൻ ഫുട്‍ബാൾ അസോസിയേഷൻ പ്രസിഡന്‍റ്​‌ മുജീബ് കളത്തിൽ ടൂർണമെന്‍റ്​ കിക്ക് ഓഫ്‌ ചെയ്തു. സൽക്കാര ഫാമിലി റസ്റ്റാറന്‍റ്​ മാനേജിങ് പാർട്ണർ താജുദ്ദീൻ ഫിറോസ് മുഖ്യാതിഥിയായിരുന്നു. ക്ലബ് പ്രസിഡന്‍റ്​ അഫ്‌താബ്‌ സ്വാഗതവും ജനറൽ സെക്രട്ടറി പ്രേംലാൽ നന്ദിയും പറഞ്ഞു. ടൂർണമെന്‍റ്​ കമ്മിറ്റി കൺവീനർ ഫവാസ്, അംഗങ്ങളായ സിറാജ്, ജസീം, സുനീർ, ഷനൂബ്, ആസിഫ് എന്നിവർ നേതൃത്വം നൽകി. ഏഴ് ആഴ്ചകളിലായി നടക്കുന്ന ടൂർണമെന്‍റിൽ ആറു ടീമുകളാണ് പങ്കെടുക്കുന്നത്. ലീഗ് റൗണ്ടിൽ ഏറ്റവും കൂടുതൽ പോയന്‍റുകൾ നേടുന്ന നാല് ടീമുകളാവും സെമി ഫൈനൽ കളിക്കുക.

ആറ് ടീമുകളിലായി നൂറോളം കളിക്കാരാണ് ടൂർണമെന്‍റിൽ പങ്കെടുക്കുക. കോവിഡ് നിബന്ധനകൾ പൂർണമായി പാലിച്ചായിരിക്കും ടൂർണമെന്‍റ്​ നടത്തുകയെന്ന് സംഘാടകർ പറഞ്ഞു. ആദ്യ ദിനം മൂന്നു കളികളാണ് നടന്നത്. മലബാർ കിങ്‌സും മലബാർ ടസ്കേഴ്സുമായി നടന്ന മത്സരം സമനിലയിൽ കലാശിച്ചു. രണ്ടാം മത്സരത്തിൽ മലബാർ റോയൽസിനെ എം.യു.എഫ്​.സി ഓൾഡ് ബോയ്സ് ഒന്നിനെതിരെ രണ്ടു ഗോളുകൾക്ക് പരാജയപ്പെടുത്തി. മൂന്നാമത്തെ മത്സരത്തിൽ മലബാർ ചാർജേഴ്സ് എതിരില്ലാത്ത ഒരു ഗോളിന് മലബാർ ടൈറ്റൻസിനെ പരാജയപ്പെടുത്തി. ലീഗ് റൗണ്ടിലെ മത്സരങ്ങൾ വരും ആഴ്ചകളിൽ തുടരുമെന്ന് ടൂർണമെന്‍റ്​ കമ്മിറ്റി കൺവീനർ ഫവാസ് അറിയിച്ചു.