സൗദിയിൽ ദിനേനയുള്ള പുതിയ കോവിഡ് രോഗികളുടെ എണ്ണം മുന്നൂറിനോടടുക്കുന്നു

ജിദ്ദ: സൗദിയിൽ ദിനേന റിപ്പോർട്ട് ചെയ്യുന്ന പുതിയ കോവിഡ് രോഗികളുടെ എണ്ണം മുന്നൂറിനോടടുക്കുന്നു. ഇന്ന് 287 പുതിയ കോവിഡ് രോഗികളും 113 രോഗമുക്തിയും റിപ്പോർട്ട് ചെയ്തു. ഇതുവരെ രാജ്യത്ത് റിപ്പോർട്ട് ചെയ്യപ്പെട്ട ആകെ കോവിഡ് കേസുകളുടെ എണ്ണം 5,51,749 ഉം രോഗമുക്തരുടെ എണ്ണം 5,40,506 ഉം ആയി. പുതുതായി ഒരു മരണം കോവിഡ് മൂലമാണെന്ന് റിപ്പോർട്ട് ചെയ്തു.

ഇതോടെ ആകെ മരണം 8,868 ആയി. നിലവിൽ 2,375 പേർ ചികിത്സയിലുണ്ട്. ഇവരിൽ 35 പേർ ഗുരുതരാവസ്ഥയിലാണ്. ഇവർ രാജ്യത്തെ വിവിധ ആശുപത്രികളിൽ തീവ്രപരിചരണ വിഭാഗത്തിലാണ്. ബാക്കിയുള്ളവരുടെ നില തൃപ്തികരമാണ്.

രാജ്യത്തെ കോവിഡ് മുക്തി നിരക്ക് 98 ശതമാനവും മരണനിരക്ക് 1.6 ശതമാനവുമായി തുടരുന്നു. റിയാദിലാണ് ഏറ്റവും കൂടുതൽ രോഗികൾ വർധിക്കുന്നത്. 116 പേർക്കാണ് ഇന്ന് റിയാദിൽ രോഗം ബാധിച്ചത്. ജിദ്ദയിൽ 47 ഉം മക്കയിൽ 36 ഉം ദമ്മാമിൽ 12 ഉം മദീനയിൽ 9 ഉം പേർക്ക് പുതുതായി രോഗം ബാധിച്ചു. സൗദി അറേബ്യയിൽ ഇതുവരെ 48,986,511 ഡോസ് കോവിഡ് വാക്സിൻ വിതരണം ചെയ്തു. ഇതിൽ 24,920,216 ആദ്യ ഡോസും 23,014,581 രണ്ടാം ഡോസും 1,051,714 ബൂസ്റ്റർ ഡോസുമാണ്.