കാറിന് തീപിടിച്ചു; കാറോട്ട താരം കഷ്ടിച്ച് രക്ഷപ്പെട്ടു

ജിദ്ദ: സൗദി കാറോട്ട താരം യസീദ് അൽറാജിഹി കാറപകടത്തിൽനിന്ന് കഷ്ടിച്ച് രക്ഷപ്പെട്ടു. പോളണ്ടിൽ ക്രോസ്കൺട്രി റാലിക്കുവേണ്ടിയുള്ള ലോകകപ്പിെൻറ പോളിഷ് ബജാ റൗണ്ടിൽ പങ്കെടുക്കുന്നതിനിടെയാണ് കാറിന് തീപിടിച്ചത്. കാറിന് സാങ്കേതിക തകരാറുണ്ടാകുകയും പിന്നീട് പൂർണമായും കത്തിനശിക്കുകയുമായിരുന്നു. തീപിടിത്തത്തിന്റെ വിഡിയോ സമൂഹമാധ്യമങ്ങളിൽ വ്യാപകമായി പ്രചരിച്ചു. താനും സഹായിയും സുഖമായിരിക്കുന്നുവെന്ന് യസീദ് അൽറാജിഹ് തന്നെ ട്വിറ്ററിലൂടെ അറിയിക്കുകയായിരുന്നു.

ട്വിറ്ററിൽ തന്റെ കാറിൽ തീ ആളിപ്പടരുന്നതിെൻറ ചിത്രവും വിഡിയോയും യസീദ് അൽറാജിഹ് പോസ്റ്റ് ചെയ്‌തു. 'ദൈവത്തിന് സ്തുതി, ഒരപകടത്തിൽനിന്ന് രക്ഷപ്പെട്ടു. സാങ്കേതിക തകരാർ കാരണം മരുഭൂ റാലിക്ക് വേണ്ടിയുള്ള ലോകകപ്പിെൻറ ബജാ പോളണ്ട് റൗണ്ടിൽ എെൻറ കാർ കത്തിയമർന്നു. ഞാനും സഹായിയും സുഖമായിരിക്കുന്നു. എനിക്കുവേണ്ടി പ്രാർഥിക്കുകയും സംഭവത്തെക്കുറിച്ച് അന്വേഷിക്കുകയും ചെയ്ത എല്ലാവർക്കും നന്ദി പറയുന്നു. എനിക്ക് മറുപടി നൽകാൻ കഴിയാത്തതിൽ ക്ഷമ ചോദിക്കുന്നു'' എന്നാണ് യസീദ് അൽറാജിഹി ട്വിറ്ററിൽ കുറിച്ചത്. 'പെട്ടെന്ന് ഇന്ധന ഗന്ധം പുറത്തേക്ക് വമിച്ചു.

ഉടൻതന്നെ മുന്നറിയിപ്പ് അടയാളം പ്രത്യക്ഷപ്പെട്ടു. ഇന്ധന ഗന്ധം വ്യാപകമായി പരന്നു. വാഹനം നിർത്തി. ഉടൻ താനും സഹായി മൈക്കിളും വേഗത്തിൽ പുറത്തിറങ്ങുകയായിരുന്നു' -കാർ കത്തിയതിനെക്കുറിച്ച് യസീദ് അൽറാജിഹി ഇങ്ങനെയാണ് വിവരിക്കുന്നത്. സഹായിക്ക് നിസ്സാര പരിക്കുണ്ടെന്നും അദ്ദേഹം കൂട്ടിച്ചേർത്തു.