താൽകാലിക തടയണ തകർന്നു; കെടുതികളേറെയും അല്ലീതിൽ

ജിദ്ദ: മക്ക മേഖലയിൽ വ്യാഴം, വെള്ളി ദിവസങ്ങളിലുണ്ടായ മഴയിൽ കൂടുതൽ കെടുതികളുണ്ടായത്​ അല്ലീതിൽ.​ അതിശക്​തമായ മഴയാണ്​ ​പ്രദേശത്തുണ്ടായത്​. വാദി അല്ലീതിലെ താൽകാലിക തടയണ തകർന്നതാണ്​ റോഡുകളിലും പരിസര പ്രദേശങ്ങളിലും വെള്ളം കയറാൻ കാരണമായത്​ എന്നാണ്​ റിപ്പോർട്ട്​ ​. ഹയ്യ്​ കുലൈബിയയിലാണ്​ ഏറ്റവും കു​ടുതൽ കെടുതി റിപ്പോർട്ട്​ ചെയ്​തത്. പല​ റോഡുകളും വെള്ളത്തിനടിയിലായി. കടകളിലേക്കും വീടുകളിലേക്കും വെള്ളം ​കയറി. താഴ്​വരകൾ കവിഞ്ഞൊഴുകി. ​വൈദ്യുതി പോസ്​റ്റുകൾ വീണു. ഇതേ തുടർന്ന്​ ചില ഭാഗങ്ങളിൽ വൈദ്യുതി നിലച്ചു. നിരവധി പേർ വീടിനുള്ളിലും വാഹനത്തിലും കുടുങ്ങി. സിവിൽ ഡിഫൻസ് എത്തിയാണ്​ പലരേയും​ രക്ഷപ്പെടുത്തിയത്​. രക്ഷാപ്രവർത്തനത്തിനും സഹായത്തിനും സിവിൽ ഡിഫൻസിന്​ കീഴിലെ മുങ്ങൽ വിദഗ്​ധരടക്കം സന്നദ്ധ സേവകരും സ്​ഥലത്തുണ്ട്​. വിവിധ വകുപ്പുകളും സേവനങ്ങളുമായി രംഗത്തുണ്ട്​. റോഡുകളിലെ ചളിയും വെള്ളവും നീക്കം ചെയ്യാൻ മുനിസിപ്പാലിറ്റിക്ക്​ കീഴിൽ കൂടുതൽ തൊഴിലാളികളെ നിയോഗിച്ചിട്ടുണ്ട്.

സിവിൽ ഡിഫൻസി​​​െൻറ സഹായം തേടി 89 കാളുകളെത്തിയതായി മക്ക മേഖല അസി.​ വക്​താവ്​ കേണൽ മുഹമ്മദ്​ അൽഖർനി പറഞ്ഞു. 69 ആളുകളെയും 23 വാഹനങ്ങളും രക്ഷപ്പെടുത്തി. എട്ട്​ കുടുംബത്തിൽ നിന്നുള്ള 45 പേർക്ക്​ അഭയം നൽകിയതായും സിവിൽ ഡിഫൻസ്​ വക്​താവ്​ പറഞ്ഞു. പ്രത്യേക അടിയന്തിര സേവന പദ്ധതിയിലാണ്​ പ്രദേശത്ത്​ രക്ഷാപ്രവർത്തനങ്ങൾ നടപ്പിലാക്കിയതെന്നും അദ്ദേഹം പറഞ്ഞു. മഴക്കെടുതിയുണ്ടായ സ്​ഥലങ്ങൾ ​അല്ലീത്​ ഗവർണർ മുഹമ്മദ്​ ബിൻ അബ്​ദുൽ അസീസ്​ അൽഖുബാഅ്​ സന്ദർശിച്ചു. മക്ക മേഖല സിവിൽ ഡിഫൻസ്​ മേധാവി കേണൽ സാലിം അൽമത്​റഫിയും അദ്ദേഹത്തെ അനുഗമിച്ചിരുന്നു. ഗവർണർ ആളുകളെ ആശ്വാസിപ്പിച്ചു. റോഡുകളിലെ വെള്ളം നീക്കം ചെയ്യാൻ അല്ലീത്​ മുനിസിപ്പാലിറ്റി ജിദ്ദ മുനിസിപ്പാലിറ്റിയുടെ സഹായം തേടിയതായും ഗവർണർ പറഞ്ഞു.