വിദ്യാർഥികൾക്ക്​​ ത്വക്​രോഗം:  അടിയന്തിര നടപടിക്ക്​ നിർദേശം 

മക്ക: സ്കൂൾ വിദ്യാർഥികൾക്കിടയിൽ ത്വക്​രോഗം പടരുന്നത്​ തടയുന്നതിന്​ ആവശ്യമായ നടപടികൾ സ്വീകരിക്കാൻ മക്ക ഗവർണർ അമീർ ഖാലിദ്​ അൽഫൈസൽ നിർദേശം നൽകി. ജിദ്ദ ഗവർണറേറ്റിൽ വിദ്യാഭ്യാസ മന്ത്രി ഡോ. അഹ്​മദ്​ അൽഇൗസയുമായി കൂടിക്കാഴ്​ചയിലാണ്​ ഗവർണർ ഇക്കാര്യം പറഞ്ഞത്​. മക്കയിലെ സ്​കൂളുകളിൽ ആരോഗ്യമന്ത്രാലയവുമായി സഹകരിച്ച്​ ത്വക്​രോഗ​ം തടയുന്നതിന്​ സ്വീകരിച്ച നടപടികൾ ഗവർണർക്ക്​ വിശദീകരിച്ചുകൊടുത്തു. രോഗബാധയുള്ള സ്​കൂളുകളിൽ കൂടുതൽ വിദ്യാർഥിനികളിലേക്ക്​ പകരാതിരിക്കാൻ നടപടി സ്വീകരിച്ചതായി വിദ്യാഭ്യാസ മന്ത്രി വ്യക്​തമാക്കി. കാര്യങ്ങൾ നിയന്ത്രണാധീനമാണെന്നും ബന്ധപ്പെട്ട വകുപ്പുകൾ വേണ്ട ശ്രമങ്ങൾ നടത്തിവരുന്നുണ്ടെന്നും മന്ത്രി പറഞ്ഞു. മേഖല വിദ്യാഭ്യാസ ഒാഫീസ്​ മേധാവി മുഹമ്മദ്​ അൽഹാരിസിയും മന്ത്രിയെ അനുഗമിച്ചിരുന്നു.

മക്കയിലെ വിവിധ സ്​കൂളുകളിൽ പഠിക്കുന്ന ആൺകുട്ടികളിലും പെൺകുട്ടികളിലും ത്വക്​രോഗം ബാധിച്ചവരുടെ എണ്ണം മുമ്പുണ്ടായിരുന്നതിനേക്കാൾ കൂടിവരുന്നതായി പ്രാദേശിക പത്രം റിപ്പോർട്ട്​ ചെയ്​തിരുന്നു. 500 ലധികം വിദ്യാർഥികൾക്ക്​ രോഗമുണ്ടെന്നാണ്​ റിപ്പോർട്ട്​. മ്യാൻമർകാരായ വിദ്യാർഥികൾക്കിടയിലാണ്​​ കൂടുതൽ രോഗപകർച്ച റിപ്പോർട്ട്​ ചെയ്​തത്​. മറ്റ്​ രാജ്യക്കാർക്കിടയിലും രോഗം കണ്ടെത്തിയിട്ടുണ്ട്​. രോഗമുള്ള കുട്ടികൾക്ക്​ ചികിത്സാവധി​ നൽകാനും വിദ്യാഭ്യാസ കാര്യാലയം തീരുമാനിച്ചിട്ടുണ്ട്​.  
അതേസമയം, ജിദ്ദ മേഖലയിലെ സ്​ക്കൂൾ വിദ്യാർഥികൾക്ക്​ ഇതുവരെ ത്വക്​രോഗം റിപ്പോർട്ട്​ ചെയ്​തിട്ടില്ലെന്ന്​ ജിദ്ദ ​ആരോഗ്യകാര്യാലയം വ്യക്​തമാക്കി.