സൗദി വടക്കൻ അതിർത്തി മേഖലയിൽ മഞ്ഞുവീഴ്ച

ജിദ്ദ: സൗദി അറേബ്യയുടെ വടക്കൻ അതിർത്തി മേഖലയിലെ തുറൈഫിൽ കനത്ത മഞ്ഞുവീഴ്​ച. തിങ്കളാഴ്​ച പുലർച്ചെയാണ്​​ മഞ്ഞ്​ വീഴ്​ച്ചയുണ്ടായത്​. തബൂക്കിന്‍റെ ചില ഭാഗങ്ങളിലും മഞ്ഞ്​ വീഴ്​ചയുണ്ടായതായി റിപ്പോർട്ടുണ്ട്​.

തുറൈഫി​​ലെ പല ഭാഗങ്ങളും മഞ്ഞിന്‍റെ​ വെള്ള പുതച്ചിരിക്കുകയാണ്​. താപനില കുറഞ്ഞ്​ പൂജ്യം ഡിഗ്രി സെൽഷ്യസിന്​ താഴെയാണ്​. മഞ്ഞ്​ വീഴ്​ച കണ്ട്​ ആസ്വദിക്കാൻ നിരവധി ആളുകളാണ്​ പുറത്തിറങ്ങിയത്​. തുറൈഫിൽ പൂജ്യം ഡിഗ്രി സെൽഷ്യസിനു താഴെയുള്ള താപനിലയാണ്​ രേഖപ്പെടുത്തിയത്​. വടക്കൻ മേഖലയിൽ ചൊവ്വാഴ്​ച രാവിലെ വരെ മഞ്ഞുവീഴ്ച തുടരുമെന്ന്​ പ്രതീക്ഷിക്കുന്നതായി തബൂക്ക് മേഖല കാലാവസ്ഥാ വിഭാഗം ഡയറക്ടർ ഫർഹാൻ അൽഅൻസി പറഞ്ഞു.

എല്ലാവരും ജാഗ്രത പാലിക്കണമെന്ന്​ അദ്ദേഹം മുന്നറിയിപ്പ്​. സൗദി അറേബ്യയുടെ വടക്കൻ അതിർത്തി, തബൂക്ക് മേഖലയിലെ ഉയരം കൂടിയ സ്ഥലങ്ങളിൽ മഞ്ഞു വീഴ്​ചയുണ്ടായതായി കാലാവസ്ഥാ നിരീക്ഷകൻ അഖിൽ അൽഅഖീൽ പറഞ്ഞു. ഈ പ്രദേശങ്ങളിൽ പ്രത്യേകിച്ച് ഉയർന്ന പ്രദേശങ്ങളിലും തബൂക്ക് മേഖലയുടെ തെക്കൻ പ്രദേശങ്ങളിലും മഞ്ഞുവീഴ്ച തുടരുമെന്ന് കാലാവസ്ഥ വിഭാഗം പ്രതീക്ഷിക്കുന്നു. ചൊവ്വാഴ്​ച വടക്കൻ ഭാഗങ്ങളിലും ഹാഇൽ പ്രവിശ്യയിലെ ഉയരം കൂടിയ ഭാഗങ്ങളിലും മഞ്ഞുവീഴ്ച തുടരാനുള്ള സാധ്യതയുണ്ട്​.

താപനില കുറയുമെന്ന് പ്രതീക്ഷിക്കുന്നു. മിക്ക വടക്കൻ, വടക്ക് പടിഞ്ഞാറൻ പ്രദേശങ്ങളിലും കുറഞ്ഞ താപനില പൂജ്യം ഡിഗ്രി സെൽഷ്യസിലും താഴെയെത്തും. വടക്കൻ മേഖലയിലെ ചില പ്രദേശങ്ങളിൽ പരമാവധി താപനില 10 ഡിഗ്രി സെൽഷ്യസിൽ താഴെയെത്താം. പല പ്രദേശങ്ങളിലും താപനിലയിൽ വ്യക്തമായ കുറവ്​ വന്നതിനാൽ ഈ ആഴ്ച അവസാനം വരെ മഞ്ഞ് വീഴ്​ച തുടരാൻ സാധ്യതയുണ്ടെന്ന് പ്രതീക്ഷിക്കുന്നതായും അദ്ദേഹം പറഞ്ഞു.