15 വർഷത്തിന് ശേഷം അവരെത്തി, തങ്ങളെ 'വേർപ്പെടുത്തിയ' ഡോക്​ടറെ കാണാൻ

ജിദ്ദ: ഒറ്റ ഉടലിൽനിന്ന് തങ്ങളെ വേർപ്പെടുത്തിയ ഡോക്ടറെ കാണാൻ 15 വർഷത്തിന് ശേഷം അവർ സൗദിയിലെത്തി. കൈക്കുഞ്ഞുങ്ങളായിരിക്കെ റിയാദിൽ വേർപ്പെടുത്തൽ ശസ്​ത്രക്രിയക്ക്​ വിധേയരായ ഒമാനി സയാമീസ്​ ഇരട്ടകളാണ് കൗമാരപ്രായത്തിലെത്തിയപ്പോൾ, തങ്ങൾക്ക് വേറിട്ട ജീവിതങ്ങൾ നൽകിയ ഡോക്​ടറെ കാണാനെത്തിയത്. സയാമീസ് ഇരട്ടകളായിരുന്ന സഫയും മർവയുമാണ്​ മാതാപിതാക്കളോടൊപ്പം ശസ്ത്രക്രിയ തലവനായ ഡോ. അബ്​ദുല്ല അൽറബീഅയെ കാണാൻ ഒമാനിൽനിന്ന് റിയാദിലെത്തിയത്.

സൗദി നാഷനൽ ഗാർഡ് ഫോഴ്സ് ഉടമസ്ഥതയിലുള്ള റിയാദിലെ കിങ്​ അബ്​ദുൽ അസീസ് മെഡിക്കൽ സിറ്റിയിൽ 2007ലാണ് തലയോട്ടികൾ ഒട്ടിച്ചേർന്ന നിലയിലായിരുന്ന ഒമാനി സയാമീസുകളുടെ വേർപ്പെടുത്തൽ ശസ്​ത്രക്രിയ വിജയകരമായി നടന്നത്​. അന്ന് കൈക്കുഞ്ഞുങ്ങളായിരുന്ന അവർ ഇപ്പോൾ വൈദ്യപരിശോധനയുടെ തുടർനടപടികൾക്കായാണ് സൗദിയിലെത്തിയത്.

സയാമീസ്​ ഇരട്ടകളെ വേർപെടുത്തുന്ന കാര്യത്തിൽ ഏറ്റവും ഉയർന്ന അന്താരാഷ്ട്ര പദവിയിലെത്താൻ സൗദി അറേബ്യക്ക് കഴിഞ്ഞത് ​ഭരണകൂടത്തിന്റെ പരിധിയില്ലാത്ത പിന്തുണയും സഹായവും കൊണ്ടാണെന്ന്​ ഡോ. റബീഅ പറഞ്ഞു. സങ്കീർണമായ ശസ്ത്രക്രിയകൾ നടത്തുന്നതിൽ സൗദി അറേബ്യ വലിയ യോഗ്യ​ത നേടിക്കഴിഞ്ഞു. സൗദിക്ക്​ അകത്തുനിന്നോ പുറത്തുനിന്നോ ചികിത്സ ആഗ്രഹിക്കുന്ന എല്ലാവരുടെയും ലക്ഷ്യസ്ഥാനമാക്കി സൗദിയെ മാറ്റിയത്​ അതിന്റെ വിപുലമായ മാനുഷികവും സാങ്കേതികവുമായ കഴിവുകളാണ്. ഭൂഖണ്ഡങ്ങൾക്കും അതിർത്തികൾക്കും വംശീയതകൾക്കും അതീതമായാണ്​ സൗദി അറേബ്യയുടെ ഈ മാനുഷിക പദ്ധതി നിലകൊള്ളുന്നതെന്നും ഡോ. റബീഅ പറഞ്ഞു.

തങ്ങളുടെ രണ്ട് പെൺമക്കളുടെ വേർപ്പെടുത്തൽ ശസ്​ക്രിയ നടത്തി അവരെ ജീവിതത്തിലേക്ക്​ തിരികെ കൊണ്ടുവരാനും ചികിത്സ നൽകാനും ആവശ്യമായ ശ്രമങ്ങൾ നടത്തിയ സൗദി സർക്കാരിനോടും ജനങ്ങളോടും ഒമാനി ഇരട്ടകളുടെ മാതാപിതാക്കൾ നന്ദിയും കടപ്പാടും അറിയിച്ചു.