ശിലാകോട്ടകളുടെ നാട്​

ലോകത്ത്​ ഏറ്റവും കൂടുതൽ ശിലാകോട്ടകൾ സ്​ഥിതി ചെയ്യുന്ന പ്രദേശങ്ങളിലൊന്നാണ്​ സൗദിയുടെ തെക്ക്​ ജീസാൻ മേഖലയിലെ ദാഇർ ബനീ മാലിക്​. ജീസാൻ പട്ടണത്തിൽ നിന്ന്​ 120 കിലോമീറ്റർ അകലെ ​ മലകളും കുന്നുകളും കൃഷിയിടങ്ങളുമായി പച്ചപിടിച്ച ഗ്രാമങ്ങളാൽ ചുറ്റപ്പെട്ട പ്രദേശം.​ മാനത്തേക്ക്​ തലയുയർത്തി നിൽക്കുന്ന, വാസ്​തുശിൽപ ചാരുതയിൽ മികവാർന്ന രീതിയിൽ പണിതീർത്ത അതിപുരാതനമായ നിരവധി കോട്ടകളും ടവറുകളും ഇവിടെ കാണാം. ഗ്രാമങ്ങളിലും മലമുകളിൽ സ്​ഥിതി ചെയ്യുന്ന കോട്ടകളും ടവറുകളും സന്ദർശകരെ ആകർഷിക്കുന്നു​. പൈതൃകങ്ങളും സംസ്​കാരവും തുറന്നു കാട്ടുന്നതാണിവ​. ഖിയാർ, ദിറാഅ്​ അൽഖതം, സാഹിർ ഹസീബ, ഖുദൈഇ, റൈദ, ദാത്തുൽ മിസ്​ക്​, ശഖീഖ്​ തുടങ്ങിയ വ്യത്യസ്​ത പേരുകളിലായി നിരവധി കോട്ടകൾ പ്രദേശത്തുണ്ട്​.

ഒരോ താഴ്​വരയിലും ഒരോ മലമുകളിലും കല്ലു കൊണ്ടുണ്ടാക്കിയ കോട്ടകകളും ടവറുകളും നിലനിൽക്കുന്നുവെന്നത്​ പ്രദേശത്തി​​​െൻറ സവിശേഷതയാണ്​. മുൻകാലങ്ങളിൽ ധാരാളമാളുകൾ ഇവിടങ്ങളിൽ താമസിച്ചിരുന്നുവെന്നാണ്​ ഇതു സൂചിപ്പിക്കുന്നത്​. പള്ളികളും ആ​രാധനക്കായുള്ള സ്​ഥലങ്ങളും കോട്ടകത്ത്​ കാണാൻ കഴിയാത്തതിനാൽ ഇസ്​ലാമിക കാലത്തിന് ഏത്രയോ​ മുമ്പ്​ നിർമിച്ചവയാകുമെന്നാണ്​ കരുതുന്നത്​. സ്​ഥലത്തെ കൊത്തുപണികൾ പഠന ​വിധേയമാക്കിയവർ നൂറ്റാണ്ടുകളുടെ പഴക്ക​ം കോട്ടകൾക്കുണ്ടെന്ന്​ പറയുന്നു. വ്യത്താകൃതിയിലും നാല്​ മൂലകളോടും​ കൂടിയ കോട്ടകൾ പ്രദേശത്തുണ്ട്​. ചിലതെല്ലാം പത്ത്​ നിലകളുടെ ഉയരമുള്ളതും അടുത്തടുത്ത്​ സ്​ഥിതി ചെയ്യുന്നവയുമാണ്​.