സൗദിയിൽ 12 വയസിൽ താഴെയുള്ള കുട്ടികൾക്ക്​ ഉടൻ സ്​കൂൾ തുറക്കില്ല

യാംബു: സൗദിയിൽ 12 വയസിൽ താഴെയുള്ള വിദ്യാർഥികളുടെ ഓഫ് ലൈൻ ക്ലാസുകൾ പുനരാരംഭിക്കുന്നത് നീട്ടിവെച്ചതായി വിദ്യാഭ്യാസ മന്ത്രാലയം അറിയിച്ചു. ഈ മാസം 31ന്​ പ്രാഥമിക വിദ്യാലയങ്ങളും നഴ്‌സറി സ്‌കൂളുകളും തുറന്നു പ്രവർത്തിക്കാൻ നേരത്തെ നിശ്ചയിച്ച തീരുമാനമാണ് കോവിഡ് വ്യാപനത്തിന്​ പൂർണശമനം വരാത്ത പശ്ചാത്തലത്തിൽ ഉടൻ നടപ്പാക്കേ​െണ്ടന്ന്​ തീർപ്പിലെത്തിയത്.

കുട്ടികളുടെ ആരോഗ്യ സുരക്ഷയും സ്‌കൂളുകൾ തുറന്നാൽ കാര്യങ്ങൾ എങ്ങനെ ആവുമെന്ന ശാസ്ത്രീയ പഠനങ്ങൾ പൂർത്തിയാക്കുന്നതിനുള്ള കാലതാമസവും കണക്കിലെടുത്താണ് തുറക്കാനുള്ള തീയതി ഇനിയും നീട്ടുന്നതെന്ന് മന്ത്രാലയം വ്യക്തമാക്കി. 'മദ്റസത്തീ' എന്ന പ്ലാറ്റ്ഫോമിലൂടെ പ്രാഥമിക വിഭാഗത്തി​െൻറയും 'റൗദത്തീ' പ്ലാറ്റ്ഫോമിലൂടെ നഴ്‌സറി വിഭാഗത്തി​െൻറയും ഓൺലൈൻ പഠനം തുടരുമെന്നും മന്ത്രാലയം വ്യക്തമാക്കി.

രാജ്യത്തെ പൊതു, സ്വകാര്യ, വിദേശ സ്‌കൂളുകളിൽ ഇൻറർമീഡിയറ്റ്, സെക്കൻഡറി, സർവകലാശാല തലങ്ങളിൽ ആഗസ്​റ്റ്​ 29 മുതൽ ഓഫ് ലൈൻ ക്ലാസുകൾ ആരംഭിച്ചിരുന്നു. രാജ്യത്തുള്ള സാങ്കേതിക, തൊഴിലധിഷ്ഠിത വിദ്യാഭ്യാസ സ്ഥാപനങ്ങളും പുനരാരംഭിച്ചിട്ടുണ്ട്​. കോവിഡ് വാക്സിൻ രണ്ടു ഡോസും എടുത്തവർക്ക് മാത്രമാണ് ഇതുവരെ വിദ്യാഭ്യാസ സ്ഥാപനങ്ങളിൽ എത്താൻ അനുവാദം നൽകിയിരുന്നത്. പബ്ലിക്​ ഹെൽത്ത് അതോറിറ്റി (വിഖായ) അംഗീകരിച്ച ആരോഗ്യ മുൻകരുതലുകളും കോവിഡ് മാനദണ്ഡങ്ങളും പാലിച്ചാണ് സ്ഥാപനങ്ങളിൽ എത്തേണ്ടതെന്നും നേരത്തേ നിഷ്‌കർഷിച്ചിരുന്നു