ദമ്മാം സ്‌കൂൾ തെരഞ്ഞെടുപ്പ്:  അന്തിമ സ്​ഥാനാർഥി പട്ടികയായി

ദമ്മാം‍: ദമ്മാം‍ ഇൻറർനാഷണൽ സ്കൂൾ ഭരണ സമിതി തെരഞ്ഞെടുപ്പിലെ സ്​ഥാനാർഥികളുടെ പട്ടിക  പ്രസിദ്ധീകരിച്ചു. സൂക്ഷ്മ പരിശോധനക്ക് ശേഷം തിങ്കളാഴ്​ ചയാണ്​​ അന്തിമ പട്ടിക സ്​കൂൾ അധിക​ൃതർ പുറത്ത് ​വിട്ടത്​. പട്ടികയിലെ ഏക മലയാളി എറണാകുളം കലൂര്‍ സ്വദേശി രാമങ്കാട്​ മുഹമ്മദ്​ സുനിലാണ്​.  17 പേരാണ്​ പത്രിക നൽകിയത്​. എട്ട്​ പത്രികകൾ​ തള്ളി​. ഏക മലയാളി ഉൾ‌പ്പെടെ ഒമ്പത്​ പേരാണ്​ മത്സര രംഗത്തുണ്ടാവുക. കേരളത്തെയും ബിഹാറിനെയും പ്രതിനിധീകരിച്ച് ഏക സ്ഥാനാർഥികളായതിനാല്‍ എതിരില്ലാതെ തെരഞ്ഞെടുക്കപ്പെടും. അതേസമയം ഭരണ സമിതിയുടെ മൂന്നാം വര്‍ഷത്തില്‍ കേരളത്തി​​​െൻറ പ്രാതിനിധ്യം ഉണ്ടാവില്ലെന്ന്​ ഉറപ്പായി​. മുഹമ്മദ്​ സുനിലിന്​  രണ്ട് വര്‍ഷം മാത്രമേ രക്ഷിതാവെന്ന നിലയില്‍ സ്‌കൂള്‍ ഭരണ സമിതിയില്‍ തുടരാന്‍ സാധിക്കൂ. മൂന്നാം വര്‍ഷം ഭരണ സമിതിയില്‍ മലയാളി പ്രാതിനിധ്യം ഉണ്ടാവില്ല.

മുൻ ഭരണ സമിതിയംഗങ്ങളായ റഷീദ്​ ഉമർ, അബ്​ദുല്ല മാഞ്ചേരി എന്നിവരാണ്​ പട്ടികയിൽ നിന്ന്​ ഒഴിവാക്കപ്പെട്ട രണ്ട്​ മലയാളികൾ. വിദ്യാഭ്യാസ മന്ത്രാലയത്തിലെയും ഇന്ത്യൻ എംബസിയിലെയും പ്രതിനിധികളടങ്ങുന്ന തെരഞ്ഞെടുപ്പ് കമീഷനാണ്​  സൂക്ഷ്​മ പരിശോധനക്ക്​ ശേഷം സ്​ഥാനാർഥി പട്ടികക്ക്​ അനുമതി നൽകിയത്​. മെയ്​ നാലിനാണ്​ തെരഞ്ഞെടുപ്പ്​. സ്ഥാനാർഥിത്വം പിൻവലിക്കാനുള്ള അവസാന തീയതി വ്യാഴാഴ്​ചയാണ്​. തെരഞ്ഞെടുപ്പ്​ പ്രഖ്യാപിച്ചപ്പോൾ തുടക്കത്തിൽ മലയാളികൾക്കിടയിൽ സമവായത്തിനായുള്ള ശ്രമങ്ങൾ ഉണ്ടായിരുന്നു. മലയാളികൾക്കിടയിൽ നിന്ന്​ ഒരു സ്​ഥാനാർഥിയെന്ന നിലയിൽ ചർച്ച നടന്നെങ്കിലും പലകാരണങ്ങളാൽ ഫലം കണ്ടില്ല. പിന്നീട് റഷീദ്​ ഉമറിനെയും അബ്​ദുല്ല മാഞ്ചേരിയെയും പിന്തുണച്ച്​ ചില സംഘടനകൾ മുന്നോട്ടുവന്നു. ഇതോടെ, ചർച്ച മുറുകുകയും സംഘടനകൾ പല തട്ടിലാവുകയും ചെയ്​തു.

ഇത്തരത്തിൽ  മുഖ്യധാര മലയാളി സംഘടനകൾക്കിടയിൽ ഏറെ  വിവാദങ്ങൾക്ക്​ വഴിവെച്ച സ്​ഥാനാർഥി നിർണയ ചർച്ചകൾക്കൊടുവിലാണ്​​ അന്തിമ പട്ടിക അധിക​ൃതർ പുറത്തുവിട്ടത്​. എട്ട്​ പേരുടെ പത്രിക തള്ളാനുണ്ടായ കാരണം സ്‌കൂള്‍ അധികൃതര്‍ വ്യക്​തമാക്കിയിട്ടില്ല. വരും ദിവസങ്ങളില്‍ ഇത് രക്ഷിതാക്കളുടെയും സംഘടനകളുടെയും പ്രതിഷേധങ്ങള്‍ക്ക് ഇടയാക്കാനാണ് സാധ്യത. മുമ്പും സ്‌കൂളി​​​െൻറ ഭാഗത്ത് നിന്നുണ്ടായ ഏക പക്ഷിയ തീരുമാനങ്ങള്‍ രക്ഷിതാക്കളുടെ എതിര്‍പ്പിനും നിയമ നടപടികള്‍ക്കും  കാരണമായിരുന്നു.