ഖമീസിൽ സ്​കൂൾ ബസും ട്രക്കും കൂട്ടിയിടിച്ച്​ വിദ്യാർഥിനി മരിച്ചു; 20 പേർക്ക്​ പരിക്ക്​

ഖമീസ്​ മുശൈത്ത്​​: സ്​കൂൾ ബസും ട്രക്കും കൂട്ടിയിടിച്ചുണ്ടായ അപകടത്തിൽ ഒരു വിദ്യാർഥിനി മരിക്കുകയും 20 ലധികം പേർക്ക്​ പരിക്കേൽക്കുകയും ചെയ്​തു. ഖമീസ്​ മുശൈത്തിലെ അൽഹഫാഇർ മർക്കസിലാണ് ബുധനാഴ്​ച ഉച്ചക്ക്​​​ അപകടമുണ്ടായത്​. പ്രദേശത്തെ ഒരു സ്​കൂളിലെ വിദ്യാർഥികൾ സഞ്ചരിച്ചിരുന്ന​ ബസാണ്​ അപകടത്തിൽപ്പെട്ടത്​.

വിദ്യാർഥികൾക്ക്​ പു​റമെ ഇരുവാഹനങ്ങളിലെ ഡ്രൈവർമാർക്കും പരിക്കേറ്റിട്ടുണ്ട്​. അപകട വിവരമറിഞ്ഞ്​ ട്രാഫിക്​, പൊലീസ്​, നിരവധി ആംബുലൻസ്​ സംഘങ്ങൾ എന്നിവ സ്ഥലത്തെത്തിയിരുന്നു. പരിക്കേറ്റവരെ പ്രാഥമിക ശുശ്രൂഷ നൽകിയ ശേഷം ഖമീസ്​ മുശൈത്ത്​, അൽമദാ ആശുപത്രികളിൽ പ്രവേശിപ്പിച്ചു.

അസീർ ഗവർണർ അമീർ തുർക്കി ബിൻ തലാൽ പരിക്കേറ്റവരുടെ ആരോഗ്യനിലയെ കുറിച്ച്​ അന്വേഷിച്ചു. ഖമീസ് മുശൈത്​ ഗവർണർ, അസീർ മേഖല ആരോഗ്യകാര്യ ആക്ടിങ്​ ഡയറക്ടർ ജനറൽ, അസീർ വിദ്യാഭ്യാസ ഡയറക്ടർ, ഖമീസ്​ പൊലീസ് മേധാവി എന്നിവരോട് ​ അപകടകത്തിൽപ്പെട്ടവർക്കും​ മരിച്ച കുട്ടിയുടെ കുടുംബാംഗങ്ങൾക്കും ആവശ്യമായ സഹായങ്ങൾ ചെയ്യാൻ നിർദേശം നൽകി. ആശുപത്രികളിൽ ​പ്രവേശിപ്പിച്ചവരെ പരിചരിക്കാനും കരുതലൊരുക്കാനും മാനസികരോഗ്യ ഡോക്​ടർമാരടക്കമുള്ള മെഡിക്കൽ സംഘത്തെയും നിയോഗിച്ചു.

ഫോ​ട്ടോ: അപകടത്തിൽ​ തകർന്ന ബസും ട്രക്കും​