ആദ്യം അറബിക്കാപ്പി; തനത്​ വിഭവങ്ങൾ രുചിക്കാൻ മോഹം

റിയാദ്​: കിങ്​ ഖാലിദ്​ വിമാനത്താവളത്തിലെ രാജകീയ സ്വീകരണത്തിന്​ ശേഷം ടെർമിനലിൽ പ്രത്യേകം സജ്ജമാക്കിയ ഇടത്തേക്കാണ്​ ഡൊണാൾഡ്​ ട്രംപിനെയും ഭാര്യ മെലാനിയെയും സൽമാൻ രാജാവ്​ നയിച്ചത്​. ചുരുങ്ങിയ ആമുഖ സംഭാഷണത്തിനിടെ ചെറുകപ്പിൽ ഖഹ്​വയെന്ന അറബിക്കാപ്പിയെത്തി. കുടിച്ച്​ കഴിഞ്ഞ്​ കപ്പ്​ തിരികെ പരിചാരകർക്ക്​ കൊടുക്കു​േമ്പാൾ രാജാവ്​ ഇ​ടപെട്ടു. 

അറേബ്യൻ പാരമ്പര്യ രീതിയിൽ കാപ്പി കുടിച്ചുകഴിഞ്ഞാൽ കപ്പ്​ ചെറുതായി കുലുക്കണമെന്ന്​ ട്രംപിന്​ വിശദീകരിച്ചത്​ കണ്ടുനിന്നവർക്ക്​ ​കൗതുകമായി. 
പിന്നീട് ട്രംപി​​െൻറ മകൾ ഇവാൻകക്ക്​ നൽകിയ സ്വീകരണത്തിലും സമാനമായ രംഗമുണ്ടായി. ഇത്തവണ മുതിർന്ന രാജകുടുംബാംഗം അമീർ മുഖ്​രിനാണ്​ ​ഇവാൻകക്ക്​ കാപ്പികുടിയുടെ രീതി പറഞ്ഞുകൊടുത്തത്​. ഇൗ വീഡിയോ വൈറലാകുകയും ചെയ്​തു. 

ഉച്ച ഭക്ഷണ വിഭവങ്ങളില്‍ ഉള്‍പ്പെട്ടിരുന്ന സൗദി പാരമ്പര്യ ഭക്ഷ്യവിഭവങ്ങളില്‍ പെട്ട ‘അല്‍ജരീഷ്, അല്‍മര്‍ഖൂഖ് എന്നിവയെക്കുറിച്ച്​ ട്രംപ് അന്വേഷിച്ചറിഞ്ഞു. 
സൗദിയില്‍ ചെലവഴിക്കുന്ന ദിവസങ്ങളില്‍ രാജ്യത്തെ മുഖ്യ വിഭവങ്ങള്‍ രുചിച്ചറിയണമെന്നും അമേരിക്കന്‍ പ്രസിഡന്‍റ് താല്‍പര്യം പ്രകടിപ്പിച്ചു.