ഖത്തീഫിൽ വീണ്ടും ആക്രമണം; സുരക്ഷ ഉദ്യോഗസ്​ഥൻ കൊല്ലപ്പെട്ടു

റിയാദ്​: കിഴക്കൻ പ്രവിശ്യയിൽ ദമ്മാമിനടുത്ത്​ ഖത്തീഫിൽ വീണ്ടും ആക്രമണം. പട്രോൾ സംഘത്തിന്​ നേരെയുണ്ടായ ബോംബ്​ ആക്രമണത്തിൽ ഒരു സുരക്ഷ ഉദ്യോഗസ്​ഥൻ കൊല്ലപ്പെടുകയും രണ്ടുപേർക്ക്​ പരിക്കേൽക്കുകയും ചെയ്​തു. അവാമിയയിൽ നഗര നവീകരണം നടക്കുന്ന അൽ മസൂറയിൽ ഞായറാഴ്​ച രാത്രിയാണ്​ ആക്രമണമുണ്ടായത്​. മേജർ താരിഖ്​ ബിൻ അബ്​ദുല്ലത്തീഫ്​ അൽ അല്ലാഖി എന്ന ഉദ്യോഗസ്​ഥനാണ്​ വീരമൃത്യു​ വരിച്ചതെന്ന്​ ആഭ്യന്തര മന്ത്രാലയം അറിയിച്ചു.

ഗുരുതരമായി പരിക്കേറ്റ രണ്ട്​ ഉദ്യോഗസ്​ഥരെ ആശുപത്രിയിൽ പ്രവേശിപ്പിച്ചു.  കഴിഞ്ഞ ഏതാനും ആഴ്​ചകളിൽ സമാനമായ ആക്രമണങ്ങൾ ഇൗ മേഖലയിൽ നടന്നിരുന്നു. വികസന പ്രവർത്തനം നടക്കുന്ന മേഖലയിൽ പട്രോളിങ്​ നടത്തുകയായിരുന്ന സൈനിക സംഘത്തിന്​ നേരെ റോക്കറ്റ്​ ​െ​പ്രാപ്പൽഡ്​ ഗ്രനേഡും ഉപയോഗിക്കപ്പെട്ടു. ഇതേ തുടർന്ന്​ കനത്ത സൈനിക കാവലിലാണ്​ പ്രദേശം. അവാമിയയിലെ ഒരു ഗ്രാമത്തിൽ രണ്ടുവർഷം മുമ്പ്​ ഭീകരർക്കെതിരെ നടന്ന സൈനിക നടപടിയിൽ മേജർ അല്ലാഖിക്ക്​ ഗുരുതരമായി പരിക്കേറ്റിരുന്നു. ഇൗ സംഭവത്തിൽ നാലു ഭീകരർ കൊല്ലപ്പെടുകയും ചെയ്​തു. പരിക്കിനെ തുടർന്ന്​ ചികിത്സയിലായിരുന്ന അല്ലാഖി വീണ്ടും സർവീസിൽ തിരി​​ച്ചെത്തുകയായിരുന്നു.