പുണ്യഭൂമിയിൽ ആകാശ നിരീക്ഷണം ശക്​തം 

ജിദ്ദ: മക്കയിൽ തിരക്കേറിയതോടെ ആകാശനിരീക്ഷണം ശക്​തം. അത്യാധുനിക സജീകരണങ്ങളുള്ള ​ ഹെലികോപ്​റ്ററുകൾ സദാ മക്കയുടെ മാനത്ത്​ സുരക്ഷാകണ്ണുകളുമായി റോന്ത്​ ചുറ്റുന്നുണ്ട്​​. ഏത്​ അടിയന്തിരസാഹചര്യങ്ങളെയും മുൻകൂട്ടി കാണാനും ഇട​പെടാനുമുള്ള എല്ലാ സംവിധാനങ്ങളുമായാണിവ പറക്കുന്നത്​. പതിവു പോലെ ഇത്തവണയും റമദാൻ ആദ്യം മുതൽ സുരക്ഷ വകുപ്പിനു കീഴിലെ ​ഹെലികോപ്​റ്ററുകൾ നിരീക്ഷണത്തിനും സേവനത്തിനുമായി രംഗത്തുണ്ട്​. ഒമ്പത്​ ഹെലികോപ്​റ്ററുകളാണ് ഇതിനായി ഒരുക്കിയിരിക്കുന്നത്​. 
 സുരക്ഷക്ക്​ പുറമെ ട്രാഫിക്​ കുരുക്കുകൾ, തീർഥാടകരുടെ തിരക്ക്​ എന്നിവ നിരീക്ഷിക്കാനും റിപ്പോർട്ടുകളും ദൃശ്യങ്ങളും കൺ​​ട്രോൾ റൂമിലേക്ക്​ നൽകാനും അടിയന്തിര ആരോഗ്യ സേവനത്തിനുമാണ്​ ഹെലികോപ്​റ്ററുകൾ പറക്കുന്നത്​. 

രാത്രിയിൽ ദൃശ്യങ്ങൾ പകർത്താൻ കഴിയുന്ന  കാമറ സംവിധാനത്തോട്​ കൂടിയതാണിവ. മക്കയുടെ വിവിധ ഭാഗങ്ങളിൽ ഹെലിപ്പാഡുകൾ ഒരുക്കിയിട്ടുണ്ട്​. ഇൗ വർഷം റമദാനിൽ 200 ലധികം തവണ നിരീക്ഷണ പറക്കൽ നടത്താനാകുമെന്നാണ്​​ പ്രതീക്ഷിക്കുന്നതെന്ന്​ സുരക്ഷവിമാന ജനറൽ ക്യാപ്​റ്റൻ മുഹമ്മദ്​ ബിൻ ഇൗദ്​ അൽഹർബി പറഞ്ഞു. ഇക്കഴിഞ്ഞ വർഷം റമദാനിൽ 209 തവണ (114 മണിക്കൂർ) തൊട്ടു മുൻവർഷം 193 തവണ (143 മണിക്കൂർ) നിരീക്ഷണപറക്കൽ നടത്തിയിരുന്നു എന്ന്​ അദ്ദേഹം പറഞ്ഞു. സുരക്ഷ നിരീക്ഷണത്തിനു പുറമെ മാനുഷിക സേവനങ്ങളും വിവിധ ഗവൺമ​​െൻറ്​ വകുപ്പുകൾക്കാവശ്യമായ കാര്യങ്ങൾക്കും ഹെലികോപ്​റ്റർ ഉപയോഗിച്ചുവരുന്നുണ്ട്​. അടിയന്തിര ആരോഗ്യ സേവനത്തിനാവശ്യമായ സജ്ജീകരണങ്ങ​ളോട്​ കുടിയതാണിതെന്നും അദ്ദേഹം പറഞ്ഞു.