സൈനിക പ്രൗഢി വിളിച്ചോതി  കിങ് ഫൈസല്‍ എയര്‍ അക്കാദമി ബിരുദദാനം

റിയാദ്: സൗദിഅറേബ്യയുടെ  സൈനിക പ്രൗഢി വിളിച്ചോതി കിങ് ഫൈസല്‍ എയര്‍ അക്കാദമി ബിരുദദാനവും വ്യോമാഭ്യാസപ്രകടനവും റിയാദില്‍ നടന്നു. കിങ് ഫൈസല്‍ എയര്‍ അക്കാദമിയുടെ 50ാം വാര്‍ഷികവും  91ാം ബിരുദദാനച്ചടങ്ങും  സല്‍മാന്‍ രാജാവിന്‍െറ സാന്നിധ്യത്തിലാണ് നടന്നത്. 
സൗദി അറേബ്യയുടെ ആധുനിക യുദ്ധവിമാനം എയര്‍ ക്രാഫ്റ്റ്  എഫ് 15 എസ് എ ഇതോടനുബന്ധിച്ച് കമീഷന്‍ ചെയ്തു. 
രാജ്യത്തിന്‍െറ ശക്തിയും പ്രൗഢിയും വിളിച്ചോതിയ യുദ്ധവിമാനങ്ങളുടെ പ്രകടനവും ഇതോടനുബന്ധിച്ച് നടന്നു. 
രാജ്യസുരക്ഷക്ക് വഴിത്തിരിവാകുന്ന എയര്‍ ക്രാഫ്റ്റ്  എഫ് 15ന്‍െറ പ്രോജക്ട് ഓഫിസര്‍ മേജര്‍ മുമ്മദ് ബിന്‍ അബ്ദുല്ല അല്‍ ഗമാദിയെ സല്‍മാന്‍ രാജാവ് അഭിനന്ദിച്ചു. 
രാജാവിനുള്ള ഉപഹാരം റോയല്‍ സൗദി എയര്‍ഫോഴ്സ് ആക്ടിങ് കമാന്‍ഡര്‍  സമ്മാനിച്ചു. സുഡാന്‍ പ്രസിഡന്‍റ് ഉമര്‍ അല്‍ ബശീര്‍ ചടങ്ങില്‍ സംബന്ധിച്ചു. രണ്ടാം കിരീടാവകാശി  മുഹമ്മദ് ബിന്‍ സല്‍മാന്‍ സല്‍മാന്‍ രാജാവിന് നന്ദി പറഞ്ഞു.വ്യോമാഭ്യാസപ്രകടനങ്ങള്‍ക്ക് രാജാവ് സാക്ഷ്യം വഹിച്ചു.