അവ്വല്‍ ബാങ്ക് സാബില്‍ ലയിപ്പിച്ചു; ലുബ്​ന ഒലയാൻ സാബ്​ ചെയർമാൻ

റിയാദ്: സൗദിയിലെ പ്രമുഖ രണ്ട് ബാങ്കുകള്‍ തമ്മില്‍ ലയിച്ചു. അവ്വല്‍ ബാങ്ക് സാബ് ബാങ്കില്‍ ലയിപ്പിക്കുകയാണുണ്ടായത്. ഇരു ബാങ്ക് മേധാവികളും തമ്മില്‍ നടന്ന ചര്‍ച്ചയുടെയും ധാരണയുടെയും അടിസ്ഥാനത്തിലാണ് ലയനം നടന്നതെന്ന് ഇടപാടുകാര്‍ക്ക് അയച്ച സന്ദേശത്തില്‍ അധികൃതര്‍ വ്യക്തമാക്കി. സാബ് ബാങ്ക് ബോര്‍ഡ് ചെയര്‍മാനായി ലുബ്ന സുലൈമാന്‍ അല്‍ ഒലയാനെ നിയമിച്ചതായും കമ്പനി വ്യക്തമാക്കി. ആദ്യമായാണ് സൗദിയില്‍ ഒരു വനിത ബാങ്ക് ബോര്‍ഡ് ചെയര്‍മാന്‍ സ്ഥാനത്ത് വരുന്നതെന്ന്​ അധികൃതർ പറഞ്ഞു.

അവ്വല്‍ ബാങ്കി​​​െൻറ ഓഹരികള്‍ റദ്ദ് ചെയ്​ത്​ പകരം ഉടമകള്‍ക്ക് തുല്യ എണ്ണം ഓഹരികള്‍ സാബ് നല്‍കുമെന്ന് അധികൃതർ വാര്‍ത്താകുറിപ്പില്‍ വ്യക്തമാക്കി. അവ്വല്‍ ബാങ്കി​​​െൻറ എല്ലാ ആസ്തികളും സാബിലേക്ക് നീക്കിയിട്ടുണ്ട്. പതിനാറായിരത്തിലധികം ജീവനക്കാരുള്ള ഒലയാൻ ഗ്രൂപി​​​െൻറ ചീഫ്​ എക്​സിക്യൂട്ടീവ്​ ഒാഫീസറാണ്​ ലുബ്​ന ഒലയാൻ. റിയാദിലാണ്​ കമ്പനിയുടെ ആസ്​ഥാനം. വേൾഡ്​ ഇകണോമിക്​ ഫോറത്തിലെ സ്​ഥിരം പ്രഭാഷക. ഫോർബ്​സ്​, ഫോർച്യൂൺ, ടൈം മാഗസിനുകൾ ലോകത്തെ ബിസി​നസ്​ മേഖലയിൽ ഏറ്റവും സ്വാധീന ശക്​തിയുള്ള വ്യക്​തിത്വമായി തെരഞ്ഞെടുക്കപ്പെട്ട വനിതയാണിവർ.