യാമ്പു വ്യവസായ നഗരിയിലെ തീപിടിത്തം: പരിക്കേറ്റവരെ ഗവർണർ സന്ദർശിച്ചു

യാമ്പു: വ്യസായ നഗരിയിലെ നാഷനൽ പെട്രോകെമിക്കൽ ഇൻഡസ്ട്രിയൽ കമ്പനിയിൽ ചൊവ്വാഴ്ചയുണ്ടായ തീപിടിത്തത്തിൽ പരിക്കേറ്റവരെ യാമ്പു ഗവർണർ സാദ് ബിൻ മർസൂഖ് അൽ സുഹൈമി സന്ദർശിച്ചു. റോയൽ കമീഷനിലെ മെഡിക്കൽ സ​​െൻററിൽ പ്രവേശിപ്പിച്ചവരെയാണ് ഗവർണർ സന്ദർശിച്ചത്. അപകടത്തിൽ ചെന്നൈ സ്വദേശി ജെ. പി ജയപ്രകാശ് മരിച്ചവിവരം അധികൃതർ പുറത്തു വിട്ടിരുന്നു.

പരിക്കേറ്റവർക്ക് വിദഗ്ധ ചികിത്സ നൽകാൻ ഗവർണർ ബന്ധപ്പെട്ടവർക്ക് നിർദേശം നൽകി. നാറ്റ്പെറ്റ് കമ്പനി അധികൃതർ, റോയൽ കമീഷനിലെ ഉയർന്ന ഉദ്യോഗസ്‌ഥർ, മെഡിക്കൽ സ​​െൻററിലെ ഉന്നതർ തുടങ്ങിയവരുമായി അഗ്​നിബാധയുമായി ബന്ധപ്പെട്ട വിഷയത്തിൽ ഗവർണർ ചർച്ച നടത്തി. സംഭവത്തെ കുറിച്ച് അന്വേഷണം നടത്താൻ ബന്ധപ്പെട്ടവർ പ്രത്യേക സമിതിയെ നിയോഗിച്ചിട്ടുണ്ട്​. യാമ്പുവിലെ സിവിൽ ഡിഫൻസ്, അഗ്​നിശമന വിഭാഗവും മറ്റുസുരക്ഷാ വിഭാഗവും കൂടുതൽ ഉണർന്നുപ്രവർത്തിച്ചതിനാൽ വൻദുരന്തം ഇല്ലാതാക്കാൻ കഴിഞ്ഞുവെന്നും ബന്ധപ്പെട്ടവർ പറഞ്ഞു.