തൊഴിൽപ്രശ്​നം ഒത്തുതീർന്നു; മലയാളികളടക്കം മടങ്ങുന്നു

റിയാദ്​: ഒരു വർഷത്തോളം ശമ്പളം മുടങ്ങിയ കമ്പനിയിലെ തൊഴിൽ പ്രശ്​നം ഒത്തുതീർന്നു. കോടതിക്ക്​ പുറത്തുണ്ടായ ഒത്തുതീർപ്പിനെ തുടർന്ന്​ മലയാളികളും തമിഴ്​നാട്ടുകാരുമായ തൊഴിലാളികൾ നാട്ടിലേക്ക്​ മടങ്ങി തുടങ്ങി. അഞ്ചുപേർ കഴിഞ്ഞ ദിവസം നാട്ടിലെത്തി. അവശേഷിക്കുന്നവരിൽ മൂന്നുപേർ വ്യാഴാഴ്​ച തിരിക്കും. ബാക്കിയുള്ളവർ അടുത്തയാഴ്​ചകളിൽ പോകും. റിയാദിൽ പ്രവർത്തിക്കുന്ന ഒരു ഇന്ത്യൻ കമ്പനിയിലെ തൊഴിലാളികളാണ്​ പ്രശ്​നത്തിലായിരുന്നത്​. റോഡുകളിൽ ടെലിഫോൺ കേബിളുകൾ സ്ഥാപിക്കുന്ന കരാർ ജോലികൾ ചെയ്യുന്ന കമ്പനിയിലെ മലയാളികളും തമിഴ്​നാട്ടുകാരും ഉൾപ്പെടെ 12 തൊഴിലാളികളാണ്​ ശമ്പളം മുടങ്ങിയെന്ന പരാതിയുമായി കഴിഞ്ഞ മാസം ഇന്ത്യൻ എംബസിയെ സമീപിച്ചത്​. ബില്ലുകൾ മാറികിട്ടാനും മറ്റുമുണ്ടായ കാലതാമസം മൂലമാണ്​ ശമ്പളം മുടങ്ങിയത്​. 10 വർഷത്തിലധികമായി ഇൗ കമ്പനിയിൽ ജോലി ചെയ്​തിരുന്നവരാണ്​ ഇവരെല്ലാം.

ശമ്പളം മുടങ്ങിയതിന്​ പുറമെ ഇഖാമയുടെയും ഇൻഷുറൻസി​​​െൻറയും കാലാവധി കഴിഞ്ഞിരുന്നു. ഇൗ നിലയിൽ ഇനി കമ്പനിയിൽ തുടരാൻ ആഗ്രഹിക്കുന്നില്ലെന്നും ശമ്പള കുടിശിക തീർത്തുകിട്ടി നാട്ടിൽ പോകാൻ​ വഴിയൊരുക്കണമെന്നുമായിരുന്നു തൊഴിലാളികളുടെ ആവശ്യം. പ്രവാസി മലയാളി ഫെഡറേഷൻ ഗ്ലോബൽ പ്രസിഡൻറ്​ റാഫി പാങ്ങോടാണ്​ ഇവരുടെ വിഷയം എംബസി അധികൃതരുടെ ശ്രദ്ധയിൽ പെടുത്തിയത്​. എംബസി കമ്യൂണിറ്റി വെൽഫെയർ വിങ്​ സെക്കൻഡ്​ സെക്രട്ടറി ജോർജ്​ പ്രശ്​നപരിഹാരത്തിന്​ ശ്രമം തുടങ്ങുകയും അതിനായി കമ്പനിയധികൃതരോട്​ സംസാരിക്കാൻ റാഫി പാങ്ങോടിനെ ചുമതലപ്പെടുത്തുകയും ചെയ്​തു. റാഫിയും മറ്റൊരു സാമൂഹിക പ്രവർത്തകൻ ഷെബിൻ നിലയ്​ക്കാമുക്കും കമ്പനിയധികൃതരെ കണ്ട്​ ചർച്ച നടത്തി. തൊഴിൽ കോടതിയെ സമീപിക്കാനൊരുങ്ങുകയാണെന്ന്​ അറിയിച്ചപ്പോൾ കോടതിക്ക്​ പുറത്ത്​ ഒത്തുതീർപ്പിന്​ കമ്പനിയധികൃതർ തയാറാവുകയായിരുന്നു.

എക്​സിറ്റ്​ വിസയും വിമാന ടിക്കറ്റും അത്യാവശ്യ ചെലവുകൾക്കായി 2,000 റിയാൽ വീതവും നൽകാൻ അവർ സന്നദ്ധത അറിയിച്ചു. നാലുമാസത്തിനുള്ളിൽ ശമ്പളകുടിശിക മുഴുവൻ തീർത്തു നൽകാമെന്നും സമ്മതിച്ചു. ശമ്പളം ഏറ്റുവാങ്ങാൻ സൗദിയിൽ നിലവിലുള്ള ബന്ധുക്കൾക്ക്​ എംബസിയുടെയും ചേമ്പർ ഒാഫ്​ കോമേഴ്​സി​​​െൻറയും അംഗീകാരമുള്ള അധികാര പത്രം കൂടി നൽകിയതോടെ തൊഴിലാളികൾ നാട്ടിലേക്ക്​ മടങ്ങാൻ തയാറായി. ഷി​േൻറാ ബാലരാമപുരം, ഷിനു കാട്ടാക്കട, ജയപാൽ തിരുവല്ല, ഗിൽബെർട്ട്​ ജോൺ കാട്ടാക്കട, ചെന്നൈ സ്വദേശി രാമസ്വാമി എന്നിവരാണ്​ എയർ ഇന്ത്യാ വിമാനത്തിൽ കഴിഞ്ഞ ദിവസം നാട്ടിലേക്ക്​ തിരിച്ചത്​. ബാലരാമപുരം സ്വദേശി ജയചന്ദ്രൻ, തമിഴ്​നാട്ടിലെ വിഴുപ്പുറം സ്വദേശി കുമാരൻ, കടലൂർ സ്വദേശി രാമദുരൈ എന്നിവർ വ്യാഴാഴ്​ച ശ്രീലങ്കൻ എയർലൈൻസിൽ നാട്ടിൽ പോകും. ബാക്കി നാലുപേർ അടുത്തയാഴ്​ചകളിൽ പോകും.