മക്കയിലെ പദ്ധതികൾക്ക്​ കോഒാഡിനേഷൻ കമ്മിറ്റി രൂപവത്​കരിക്കുന്നു

ജിദ്ദ: മക്ക മേഖലയിൽ പദ്ധതികൾ നടപ്പാക്കാൻ കോ ഒാഡിനേഷൻ കമ്മിറ്റി രൂപവത്​കരിക്കാൻ ഗവർണർ അമീർ ഖാലിദ്​ അൽഫൈസൽ നിർദേശം നൽകി. ജിദ്ദ ഗവർണർറേറ്റിൽ ജിദ്ദ ഗവർണർ അമീർ മിശ്​അൽ ബിൻ മാജിദ്​, മക്ക, ജിദ്ദ, ത്വാഇഫ്​ മേയർമാർ, മേഖലയിലെ ഗവൺമ​​​െൻറ്​ വകുപ്പ്​ മേധാവികൾ എന്നിവരുടെ സാന്നിധ്യത്തിൽ നടന്ന യോഗത്തിൽ അധ്യക്ഷത വഹിക്കുകയായിരുന്നു അമീർ ഖാലിദ്​. സമിതിയിൽ മുഴുവൻ വകുപ്പുകളിലെയ​ും അംഗങ്ങളെ ഉൾപ്പെടുത്തും. പദ്ധതി നടപ്പാക്കുന്നതിനുള്ള തടസ്സങ്ങൾ ഇല്ലാതാക്കുക, മാസാന്തം യോഗം ചേർന്ന്​  പ്രവർത്തന പുരോഗതി വിലയിരുത്തുക, ഒരു വർഷത്തേക്കുള്ള പ്ലാൻ തയ്യാറാക്കുക എന്നിവയും നിർദേശിച്ചിട്ടുണ്ട്​. മുഴുവൻ വകുപ്പുകളുമായി സഹകരിച്ചു പ്രവർ​ത്തിക്കണം.

പദ്ധതികൾ ​വേഗത്തിൽ നടപ്പാക്കാൻ ഇതു സഹായിക്കും. വിഷൻ 2030 നുവേണ്ട പദ്ധതികൾ അതീവ പ്രധാന്യത്തോടെ നടപ്പാക്കിവരുന്ന ഘട്ടത്തിലാണിപ്പോൾ. ഭരണാധികാരികളുടെ ആഗ്രഹങ്ങൾക്കനുസരിച്ച്​ പദ്ധതികൾ വേഗത്തിൽ നടപ്പാക്കേണ്ടതുണ്ടെന്നും മക്ക ഗവർണർ പറഞ്ഞു. ഇതുവരെ വിവിധ വകുപ്പുകൾക്ക്​ കീഴിൽ നടപ്പാക്കിയതും നടപ്പാക്കിവരുന്നതുമായ വിവിധ പദ്ധതികൾ മക്ക ഗവർണർക്ക്​ കാണിച്ചു.  ചില പദ്ധതികൾ നിർത്തിവെക്കാനുണ്ടായ കാരണങ്ങളും അവ വേഗം നടപ്പാക്കാനാവശ്യമായ കാര്യങ്ങളും യോഗത്തിൽ ചർച്ച ചെയ്യുകയും ചെയ്​തു.