ഇസ്രായേൽ ആണവ നിലയങ്ങൾ സുരക്ഷാ മാനദണ്ഡങ്ങൾക്ക് വിധേയമാക്കണം: സൗദി

റിയാദ്: ഇസ്രായേൽ ആണവ നിലയങ്ങൾ സുരക്ഷാമാനദണ്ഡങ്ങൾക്ക് വിധേയമാക്കണമെന്ന് സൗദി അറേബ്യ ആവശ്യപ്പെട്ടു. അന്താരാഷ്​ട്ര ആണവോർജ ഏജൻസിയുടെ ന്യൂയോർക്കിൽ ചേർന്ന സമ്മേളനത്തിലാണ് സൗദി പ്രതിനിധി ഈ ആവശ്യം ഉന്നയിച്ചത്. മധ്യപൗരസ്ത്യ ദേശം ആണവ മുക്തമാക്കണമെന്ന കരാറിൽ ഒപ്പുവെക്കാത്ത ഏക രാജ്യമാണ് ഇസ്രായേൽ.

ആണവ സുരക്ഷാകരാറിൽ ഒപ്പുവെക്കാൻ ഇസ്രായേലിന് മേൽ ലോക രാജ്യങ്ങൾ സമ്മർദം ചെലുത്തണമെന്നും അന്താരാഷ്​ട്ര ആണവോർജ ഏജൻസിയിലെ സൗദി പ്രതിനിധിയും സമ്മേളനത്തിലെ സൗദി സംഘത്തലവനുമായ ഡോ. ഖാലിദ് മുഹമ്മദ് മൻസലാവി ആവശ്യപ്പെട്ടു. ഇസ്രായേൽ മാത്രം കരാർ ഒപ്പുവെക്കാതിരിക്കുന്നത് മേഖലയിൽ സുരക്ഷക്ക് ഭീഷണിയാണ്.

ആണവോർജ ഏജൻസിയുടെ 2020 സമ്മേളനത്തിലേക്കുള്ള നിർദേശങ്ങൾ തയാറാക്കാനാണ്​ അംഗരാജ്യങ്ങൾ ഐക്യരാഷ്​ട്ര സഭ ആസ്ഥാനത്ത് ഒത്തുചേർന്നത്. ഐക്യരാഷ്​ട്ര സഭയുടെ 487, 689 കരാറുകൾ പാലിക്കാനും ആണവോർജ വ്യാപനം തടയാനും ഇസ്രായേൽ ബാധ്യസ്ഥമാണെന്ന് സൗദി സംഘം സമ്മേളനത്തിൽ വ്യക്തമാക്കി. ആണവായുധങ്ങൾ ഒഴിവാക്കുക, വ്യാപനം തടയുക, സമാധാന ആവശ്യത്തിന് മാത്രം ആണവോർജം ഉപയോഗിക്കുക എന്നീ മൂന്ന്​ നിബന്ധനകൾ യു.എൻ കരാറിൽ ഉണ്ടെന്നും സൗദി ഓർമിപ്പിച്ചു.