എണ്ണ വില 75 ഡോളറിന് മുകളിൽ; ഏഴ് മാസത്തെ ഏറ്റവും കൂടിയ വില

റിയാദ്: അന്താരാഷ്​ട്ര വിപണിയിൽ എണ്ണ വില ബാരലിന് 75 ഡോളറിന് മുകളിലെത്തി. കഴിഞ്ഞ ഏഴ് മാസത്തെ ഏറ്റവും കൂടിയ വിലയാണ ് വ്യാഴാഴ്​ച രേഖപ്പെടുത്തിയത്. ഇറാൻ എണ്ണ കയറ്റുമതിക്ക് മെയ് ആദ്യം മുതൽ അമേരിക്ക ഉപരോധം ഏർപ്പെടുത്തിയതാണ് വില ഉയരാൻ കാരണം. കഴിഞ്ഞ വർഷം ഒക്ടോബറിലുള്ള വിലയിലേക്കാണ് വ്യാഴാഴ്​ച ക്രൂഡ് ഓയിൽ വില ഉയർന്നത്.

അതെസമയം വില നിയന്ത്രിക്കാൻ ആവശ്യമായ മുൻകരുതലുകൾ എടുക്കുമെന്ന് സൗദി ഉൾപ്പെടെയുള്ള ഒപെക് കൂട്ടായ്മയിലെ രാജ്യങ്ങൾ തീരുമാനിച്ചിട്ടുണ്ട്. വിലയിടിവ് അനുഭവപ്പെട്ട സാഹചര്യത്തിൽ ഒപെക് കൂട്ടായ്മയിലെ രാജ്യങ്ങളും റഷ്യയും ചേർന്ന് ഉൽപാദന നിയന്ത്രണം ഏർപ്പെടുത്തിയിരുന്നു. വില വർധനവി​​െൻറ സാഹചര്യത്തിൽ ഉൽപാദന നിയന്ത്രണത്തി​​െൻറ കാര്യത്തിൽ ഒരു പുനർവിചിന്തനത്തിന്​ ഒപെക് തയാറായേക്കുമെന്ന് സാമ്പത്തിക മാധ്യമങ്ങൾ റിപ്പോർട്ട് ചെയ്‌തു.

അമേരിക്ക ഉപരോധം ശക്തമാക്കുകയും നേരത്തെ അനുവദിച്ച കയറ്റുമതി ഇളവ് പിൻവലിക്കുകയും ചെയ്യുന്നതോടെ ഇറാ​​െൻറ എണ്ണ കയറ്റുമതി പൂർണമായും നിലക്കുമെന്നാണ് പ്രതീക്ഷിക്കുന്നത്. ഈ സാഹചര്യത്തിൽ അടുത്തമാസം ആദ്യം മുതൽ എണ്ണ വില വീണ്ടും വർധിക്കാനാണ് സാധ്യത.